Uttarakhand-a assembly inthlan hmain thla khat pawh a awm tling tawh lo va, hetih lai hian Covid-19 avanga vantlang inkhawm kova campaign a theih si loh avangin party-te chuan social media hmangin hma an la nasa hle.
Februaty 14-a vote thlak turah hian BJP leh Congress chuan social media hmangin voter-te hnen thlen tumin an bei nasa hle.
Election Commission chuan hri leng darh zel avangin pun khawma campaign a khap a. BJP chuan Dehradun leh Haldwani-a an studio atangin vawi 18 zet vantlang inkhawm a ko tawh tih an party IT head Himanshu Sangtani chuan news agency PTI a hrilh.
Heng inkhawmah hian an party hruaitu langsar tak takin thu an sawi a. Heng zingah hian Chief Minister Pushkar Singh Dhami, state BJP president Madan Kaushik, Union Minister of State Ajay Bhatt, union minister hlui Ramesh Pokhriyal Nishank leh Vijay Bahuguna te pawh an tel.
“Thu sawitute hi candidate nen an tangkawp a, heng inkhawm hi live-in Facebook, Twitter leh YouTube-ah te tihchhuah a ni,” a ti.
“Heng inkhawm kan huaihawt tawhte hi mi nuai khat vel zelin an lo thlir thin,” tiin Sangtani chuan a sawi.
February 1 atang erawh chuan inkhuahkhirhna hi thlahdul deuhvin party-te hi star campaigner te nen an che chho dawn niin a sawi a. Prime Minister Narendra Modi, Union Home Minister Amit Shah BJP president JP Nadda te pawhin an tlawh dawn niin a sawi.
“Uttarkhand-ah hian Facebook hmang mi nuai 35 vel an awm a, nuai 20 chuang hnen kan thleng tawh,” tiin BJP internet media cell head Shekhar Verma chuan a sawi.
Candidate-te tan chuan a tak ngeia inlan tluk a awm loh laiin a theih si loh avangin tuna an kalpui dan chu a awm chhun niin Verma chuan a sawi a. Tunah chuan mi tin deuhthawin smartphone an neih tawh avangin a awlsam tih a sawi.
Congress pawhin social media volunteer 400 rual hmangin Facebook, Twitter, Instagram bakah WhatsApp group 150 vel an neihah an party thu leh hla an thehdarh reng tih media cell coordinator Amarjeet Singh chuan a sawi.
Content creator an tih team dinin mi 50 rualin BJP sorkar that lohna leh a hma chiaha Congress sorkar tihthatte audio-video clip leh cartoon hmanga thehdarh tur an buaipui char char a tih a sawi bawk.
Congress hian an campaign nan hian theme song – ‘Char Dham Char Kam’ tih chu Thawhtanni khan an tichhuak a, thuneihna an chan chuan thil pali an tiam a. Heng zingah hian kum tin chhungkaw nuai nga hnena Rs. 40,000 pek te, LPG cylinder man Rs. 500 pelhtir lohte pawh a tel.
Inthlah zalen deuh huna an party star campaigner-ten hun an hman dan tur pawh Delhi lamah an ruahman mek tih Singh chuan a sawi bawk.