Cameroon rama Africa khawmualpuia ramten football intihsiakna sang an khelh mek, Africa Cup of Nations inkhelah khelmual pawn lama innek buaina thlengah mi pariat vel thiin tam takin hliam an tuar.
Video thehdarha a lan dan chuan ram khawpui ber, Yaounde-a Paul Biya stadium luhna pui berah football fan-te chu te teng tung chungin an innek buai a ni.
A hmutute chuan khelmual pawna thil thleng hi a rapthlak hle tih an sawi a, mi sang chuang chu a chhunga lut thei lovin an innek buai niin an sawi.
Mi 38-in hliam an tuar a, an zinga mi pasarih chu an dinhmun a tha vak lo.
Thi zingah hian naupang pakhat a tel niin AFP news agency chuan thuneitute thu sawi a tar lang.
Khelmual hi mi 60,000 lenna a ni a; mahse, Covid-19 leng mek avanga inkhuahkhirhna avangin Thawhtanni zan inkhel hi thutna 80% chauh awh entu awm phal a ni.
Inkhel thununtute chuan mi 50,000 vel zet en luih tum an awm niin an sawi.
Danish chanchinbumi, Buster Emil Kirchner chuan khelmual luhnaah hian mi tam tak an sahawk a, khelmual luh ngei tumin an bei hlawm niin BBC a hrilh.
“An sahawk a, thenkhat an tlan a, a hungnaah an lawn a, pal lo siamte chu an tichhia a ni,” a ti a. Luh tum zingah hian ticket nei lo pawh tam tak an awm tih a sawi bawk.
Chanchinbumi, Leocadia Bongben pawhin BBC hnenah khelmual pawna fan zone pakhatah innek buaina lian tak a thleng niin a sawi.
“An au va, a hnu lawkah ambulance a lo thleng a, innek buaina thlenna lai tak hi police-ten kal an phal lo a ni,” a ti.
“A hrehawm a, inkhel en tuma lo kalte chu thiin an haw ta si a ni,” a ti.
BBC Africa producer Nick Cavell erawh chuan khelmual chhunga a awm avangin social media-a a hmuh hma chu a chhung atang chuan engmah a hre ve lo tih a sawi.
Khelmual luhkaah erawh pheikhawk leh thil dang tla darh a tam hle tih a sawi thung.
Confederation of African Football (CAF) chuan thil thleng hi an chhui nghal tur thu an sawi a. Thawhtanni zana Cameroon leh Comoros inkhelah hian a thlengtu hi 2-1 a chakin quarterfinals an lut a ni.