Central YMA chuan dan lova kuhva sumdawnna tihtawp a nih theih nana check gate rintlak tak February, 2022 ral hma ngeia siam turin sorkar an ngen.
Nimina Central YMA Executive Committee thukhawm chuan Mizoram sorkar chu dan lova kuhva rah sumdawnna tihtawp nan check gate rintlak tak siam turin an ngen a, sorkarin check gate a siam lo a nih chuan YMA-in a thiam danin hmalak an tum.
January 19, 2022-a Central YMA hruaituten chief minister an hmuh tum khan check gate siam a nih thuai theih nana hmala turin sorkar an lo ngen tawh a ni.
CEC thukhawm chuan Mizo mipuite leh political party zawng zawngte he sumdawnnaa inhnamhnawih lo tur leh hmalaknaa tel lo turin a ngen a, “He thilah hian political party-te pawh mahni hamthatna ngaihtuah lova ram leh hnam thil a nih anga tangrual tlat turin kan inngen a ni,” an ti.
CYMA chuan YMA hruaitu leh member-te he sumdawnnaa inhnamhnawih lo turin an ngen nawn leh a, he sumdawnna hian Mizo mipuiteah ngaihhlut zawng leh nun dan mawite nasa taka a nghawng avangin a tha lo zawnga hnam nun khawihtu hi YMA chuan theihtawpin a do zel dawn tih an sawi bawk.