MJA Gen. Hqrs. President Zonunsanga Khiangte chuan Mizoram Journalist Pension Scheme chu MJA Golden Jubilee lawmna hun kharna, March 23, 2021-ah sorkarin MJA Golden Jubilee present atan a peih hman beisei a nih thu a sawi.
He thu hi nimina MJA Serchhip District Annual Conference 2022, Serchhip Press Club-a neih a hmanpuinaah a sawi a. Zonunsanga Khiangte chuan MJA Golden Jubilee lawmna kharna hunah hian MJA Member Pension scheme chhawr theitute hnenah sorkarin a pek chhuah hman ngei beisei a nih thu sawiin, “MJA beiseina hi a hlawhtlin loh chuan kan lungawi lo hle ang,” a ti.
MJA president chuan Mizoram journalist-te chu sorkar hmalakna tichaktu pawimawh tak, sorkar hmalaknate mipui hnena puang darhtu ber a nih thu a sawi a. Sorkar khalh ngil a tul huna sorkar khalh ngiltu pawimawh tak a ni tih sawiin, India rama state dang zingah Mizoram journalist-te anga sorkar thawhpuitu tha an awm lo tih a sawi bawk.
MJA, Serchhip District Annual Conference hi hun thumah then niin, hun khatna, C.Ramengmawia, Vice President kaihhruaiah hian Kapliana Pachuau, president chuan inlawmna thu sawiin, T.Biakchamliana, Gen. Secretary hnen atangin kum 2020-22 chhunga MJA, Serchhip District chetvelna tlangpui ngaihthlak a ni. K.Saitluanga, DIPRO, Serchhip hnen atangin thusawi ngaihthlak a ni bawk.
Hun hnihnaah Kapliana Pachuau, president kaihhruaiin an pawl chhung inrelbawlna chungchang rorel inkhawm neih niin, resolution pahnih, ‘Serchhip District Hospital thar sak a nih thuai theih nan hmalak ni rawh se’ tih leh, ‘Kum 2022 chhungin sorkar hmalakna project site visit tam zawk neih ni rawh se’ tihte pass a ni.
Hun thumna, MJA Gen. Hqrs. hruaitute kaihhruainaa kum 2022-24 chhunga MJA, Serchhip district hruaitu tur thlan niin, president-ah C.Lalhminghlua, Vice President-ah C. Ramengmawia, Treasurer-ah Lalremruata Ralte-te bakah Executive Member tur mi panga thlan chhuah an ni.