Auto Corner
by Ruata
April-ah Maruti Suzuki Brezza thar chhuah hman beisei
Eng te nge kan hmuh dawn?
Maruti Suzuki India Limited chuan kumin choah hian lirthei thar hrang hrang tichhuak turin hma an la mek a. Heng zingah hian 2022 Maruti Suzuki Brezza chu April thlaah tlangzarh hman tura beisei a ni a. A hun erawh company lamin an lo la puang chiang leh ang a, tun tumah chuan Brezza thara kan hmuh tur hrang hrang kan en ho dawn a ni.
Maruti Suzuki hian Brezza thar mai bakah hian Baleno leh Ertiga/XL6 thar te tichhuak turin hma an la mek bawk a. Hei bakah hian Alto thar leh midsized SUV thar hlak tihchhuah an tum bawk a ni.
Maruti Suzuki Brezza hi Maruti Suzuki lirthei zinga hralh hnem pawl tak leh tunlai SUV hralh a kal em em laia an company atanga SUV kan hmuh zin leh hralh hnem ber pawl a ni a. A thar a chhuah hma hauh pawh hian lirthei hralh kal leh mite duh a ni mek a, an hralh mek reng a ni. 2022 Maruti Suzuki Brezza-ah hian tuna chhuah mekin a kentel bak hmanraw changkang hrang hrang kan hmu dawn a, a design pawh hi mawi takin an rawn tuaithar leh ang a, hmel thar duhawm tak kan hmu dawn niin a lang.
A chhunglam thar hlak
2022 Maruti Suzuki Brezza tharah hian a chhung bawr (cabin) thar hlak kan hmu dawn a, hei hi tuna chhuak mek aiin a changkan dawn bakah a chhung siamna hmanrua pawh a dak nalh ang a, a hma aiin a changkang lehzual dawn a ni. A chhunglam hian design lamah pawh theme thar hlak a nei ang a, dashboard tuaithar, instrument console thar leh thil dang dang kan hmu nual dawn a ni.
Touchscreen infotainment system, Android Auto leh Apple CarPlay connectivity awm tel lian tha keng kawng tak a awm ang a. A hmanraw changkang kentel tur hrang hrang zingah hian wireless charging system, paddle shifter leh automatic AC unit te pawh a tel dawn a ni. Hei bakah hian electric sunroof thar leh 360 degree camera a awm tel beisei a ni bawk.
Himna lamah pawh a tha dawn
2022 Maruti Brezza hi Global C platform nghahchhana duan a ni dawn a, hei hi S-Cross leh khawvel huapa hralhchhuah mek Vitara hi a hman ang a ni dawn a ni. Tunah hian Maruti Brezza chhuak mek hian himna lam tehtu GNCAP-ah 4-star a hmu mek a. Tuna a thar turah hian himna hmanraw lamah airbag 6, Electronic Stability Programme tih te a neih tawh hmel a. Maruti Suzuki chuan GNCAP 5 star a hmuh ngei theihna turin an tan beisei a ni a, himna lamah hmanraw changkang hrang hrangin an thuam tha viau tura ngaih a ni.
6-speed automatic gearbox a nei dawn
2022 Maruti Brezza hian 1.5 litre K15B petrol khawl tho, tuna Brezza-in a hman ang hi a hman hmel a, hei hi S-Cross, Ciaz leh Ertiga te pawhin an hmang mek a ni. He khawl hian 104bhp power leh 138Nm torque a pechhuak thei a.
Transmission lamah hian Mizorama kan hman tam manual gearbox a neih tho bakah tunah hian 4 speed torque converter automatic gearbox a nei mek a. Maruti Suzuki lirthei ho hi 4 speed automatic transmission nei an ni deuh vek a ni.
Brezza thar tur hian 6-speed torque converter automatic gearbox a neih beisei a ni a, hei hi a nei a nih chuan Maruti Suzuki lirthei ho tan chuan mellung thar pawimawh tak a ni dawn a. He 6 speed automatic gearbox hi ram pawn market-a Suzuki Vitara in a hman mek ang a ni.
Automatic transmission hi phai ramah chuan an hmang nasa em em a, Mizoramah pawh hi manual deuh chauh kan khalh emaw tih lai hian mi tam tak automatic transmission lirthei khalh an awm tawh a, hei hi a awlsamna leh a hahdamna avang hian kan la uar chho zel dawn pawhin a lang a, transmission system thar tha tak kan hmu tur hi a lawmawm hle a ni.
CNG a awm tel dawn
2022 Maruti Brezza lo chhuak turah hian Compressed Natural Gas hmang model a awm tel dawn a. Hei hi an lirthei tam takah pawh kan hmuh ang a ni a. India ramah hian gas hmang hi lirthei company dangah pawh a awm nual a ni. A khawl lamah chuan a khawl ngai ang tho a ni ang a, hetihrual hian gas hmang hi chu a power leh torque pekchhuah a hniam hret hmel a ni.
Tuna chhuak mek Ertiga atang hian han chhut ta ila, Maruti Ertiga CNG hian 92bhp power leh 122Nm torque a pechhuak a, hetah hian a petrol engine zawk aiin 12bhp in power a hniam zawk a, 16Nm in a torque pekchhuah a hniam zawk bawk a ni. Ertiga hian CNG kg 1 hmangin km 26.08 vel a tlan theia chhut a ni a, hei ai hian Brezza thar turah hian a tlan tam theih beisei a ni a, hei hi Ertiga aia Brezza a zan zawk vang a ni.
Reiloteah 2022 Maruti Suzuki Brezza chanchin hi chiang leh kimchang zawkin kan hre thei turah ngai ila. Company lam atanga chanchinthar i han ngaichang zel phawt teh ang.