Champhai Grape Growers Society chuan Mizoram Liquor Prohibition (MLP) Rules Drafting Study Committee-in wine siam leh zawrh khap an duh thu cabinet-a thlen an tum chu lungngaihthlak an ti.
Nimin khan Champhai Grape Growers Society Executive Committee an thukhawm a, January 24, 2022-a MLP Rules Drafting Study Committee thukhawmin MLP Rules-ah wine siam phalna tel loh nise tia an rel chu lungngaihthlak an tih thu sawiin, grape wine siam chhuah phal a nih reng lai pawha harsatna an tawh dante leh hripui leng avanga harsatna an tawh dante sawi lan niin ‘Wine Rules’ a awm loh avanga a zawrh chhuah kawnga harsatna an tawh dante an sawi lang.
Tun dinhmunah wine siam sa la hralh chhuah loh thahnem tak an neih thu leh wine-a la siam loh grape tui tam tak an la neih thu he thutkhawmah hian sawi chhuah a ni bawk a, nimin thukhawm chuan an kal leh zel dan turte Hnahlan Grape Grower & Processing Cooperative Society nen sawiho leh ni se an ti bawk.
Tar lan tawh angin MLP Rules Drafting Study Committee thukhawm chuan Champhai leh Hnahlan tlangdunga grape chingututena an thar chhuah atanga wine an siam chu khawtlang leh Kohhran inrelbawlna enin a remchang lo nia an hriat avanga MLP Rules-a wine siam phalna tel loh an rel a, he committee duh dan leh hi Council of Ministers thukhawmah thlen an tum a ni.
He committee-ah hian chairman chu Deputy Chief Minister Tawnluia a ni a, vice chairman chu Excise Minister Dr K Beichhua niin, member-te chu – minister of state pathum – Lalchhandama Ralte, Lalruatkima leh TJ Lalnuntluanga te an ni a. Thutkhawmah hian committee-in tul a tih angin MKHC, Central YMA, MUP, MHIP aiawhte sawm thin an ni.