Asia ram lian pahnihte ramria an intihbuai fona hmunah China chuan Indian rawlthar, an ram chhunga ‘dan lova lut’ nia a sawi chu a hlan let ta a. A hlan let rual hian India chu ramria a mite chetvel danah fimkhur turin a vau nghal bawk.
Indian defence ministry-in kar hmasaa kum 17 mi, Miram Tarom-a a bo chungchanga China biaa a awmna chin an hriat chuan hrilh tura an tih hnua Ningani khan a hlan let a. India hian rawlthar hi Chinese sipaite hian ram inrina vel atangin an ru niin an sawi.
Indian minister Kiren Rijiju chuan Tarom-a hi Chinese sipaite hian hmarchhaka Arunachal Pradesh-ah, ramria an duty-na hmunah Indian Army hnenah an hlan tih Twitter-ah a tar lang.
China hian an mi hlan hi India-in an rawlthar bo nia a sawi, Tarom-a a ni ngei em tih a sawi lo va; mahse, an hlan thu leh New Delhi a vau nghal thu a sawi thung.
“Indian sorkar hi inremna kan neih dunte khauh taka kengkawh turin kan ti a, mi mal pawh tih tur leh thunun chin nei tur te, ramri chhehvel pawh a boruak muanawm zawnga a awm theih nana thunun turin kan ti,” an ti.
People’s Liberation Army (PLA)-a Western Theatre Command thupuangtu, Colonel Long Shaohua chuan Indian mi hi an ramri vengtuten an patrol-naah an ram chhungah an hmu tih a sawi.
An mi hmuh hian ‘dan lovin China ram chhung lutin ramria thil kalpui dan tur zam sa awm angin thu pawh zawh fiah a ni a, khung hran (quarantine) niin a mamawh angte pawh ngaihtuahsak a ni’ tiin Long chuan WeChat-a thuchhuah an siamah a tar lang.
An mi hran hi India lamin zawnpui tura an ngen ang leh Indian sipaite nena an inbiak hnuah hlan let a nih thu a sawi bawk.
“Indian Army-in he thil hi PLA nena inringtawna an buaipui avang leh tha taka mipa naupang a haw leh thei hi ka lawm hle a ni,” tiin Arunachal Pradesh atanga Indian MP Rijiju chuan Twitter-ah a tar lang.
“Tih dan pangngai angin a dinhmun thlithlai a ni ang a, damdawi thiamte pawhin an endik ang,” a ti bawk.
India leh China ram hi thui tak ramri intawm an ni a, Himalayan tlangdunga an inrina hi a chiang lo hle a, hei vang hian ram inchuhin vawi tam inepna boruak lian tak tak an lo nei tawh thin a. China hian India hmarchhaka Arunachal Pradesh state pum chu an ram chin nia sawiin Tibet huam chhunga mi niin a sawi thin.
India hmar lamah Ladakh velah Galwan Valley-ah pawh kum 2020 khan an sipaite chu inphek sualin Indian sipai 20 leh Chinese sipai pali vel an thi.
Indian-te hi tun hnai kum eng emaw ti kal ta atang khan ramri-ah an bo fo thin a, New Delhi chuan China-in a ruk niin a puh thin a, Beijing erawh chuan a pha zel thin.