Mizoramah Covid-19 a hluar leh tak avangin thawktu inlak belh vat leh hri dona hmanrua inlakkhawm vat a tul thu nimina Health Minister Dr R Lalthangliana hova thutkhawmah tar lan a ni.
SAD Conference Hall-a Covid-19 dona kawnga thawktute leh hmanraw dinhmun sawihona neihah hri leng a hluar leh tak avanga thawktu lama harsatna an tawh dante sawi chhuah niin, hri dona kawnga volunteer mi 672 chhawr lai mekte thla hnih dang chhawr chhunzawm tura sorkarah dil mek a nih thu leh mi dang mi 173 dil belh nghal a nih thute tar lan a ni.
RT-PCR mobile van vil tur lab technician mi panga mamawh belh a nih thu leh sample lak tur a tam leh tak avang leh hri kai enkawlna hmun a lun chhoh leh tak avangin thawktu lak belh vat a tul thu thutkhawmah an tar lang.
Thutkhawmah hian sorkarin hri dona hmanrua a kawl mekin hun eng emaw chen daih rih dawnin lang mah se hma lam hun a hriat loh avangin a tul anga hmanrua inlakkhawm a tul tawh thu tar lan a ni .
PHC 61 behchhana 3C siam tura ruahmanna awmin a ken tel thil chi hrang hrang an sawiho bawk a, a thlawna sorkarin hri dona hmanrua a dawnte nasa takin sorkar phurrit a chhawk zangkai thu tar lan a ni bawk.
He thutkhawmah hian Health & Family Welfare Board Vice Chairman Dr ZR Thiamsanga, DM&R leh health department hotute an tel a ni.