Railways-a thawk tur lak dan kalhmang thlak a nih avanga Bihar-a zirlai lungawi loten ni thum chhunga tharum an thawhnaah Railway thil cheng vaibelchhe tel man a chhe tawh a. Sorkar hnathawk mi 12-in hliam an tuar tawh bawk.
Railway thil (property)-te hi Bihar-a station pali – Ara, Gaya, Nawada leh Sitamarhi-ah tihchhiat an ni hlawm.
Nawada bika thil chhia ringawt pawh Rs. Vaibelchhe 3 man vel a ni tawh a, hmun danga mite chu thuneituten a hlut zawng an chhut mek.
Railways ministry chuan hnathawk hliam tuar awmna pawh hi Nawada leh Sitamarhi-a mite an nih thu an sawi a. An zinga pali hi Railway Protection Force niin fire service-a thawk pakhat leh Railway police pahnih an ni.
Sitamarhi-ah hian zirlaiten lunga an vawm avangin Government Railway Police pathumin hliam an tuar a. Zirlaite hian vawi li/nga vel silai an hmet puak nia sawi a awm bawk a, Arms Act hmanga thubuai ziah luh a ni.
Zirlai 55 man an ni tawh a. Hengte hi Nawada-ah 32, Jehanabad-ah 22, Sitamarhi-ah 13 leh Gaya pariat an ni a. Thubuai ziah luh tawhah te zirlai engzat chiah nge an hming chuang tih erawh hriat a ni lo.
Republic Day-ah pawh khan Gaya-ah hian mihring phur rel chu hal a ni a, rel dang pawh lunga nasa taka vawm a ni bawk.
Gaya-a rel beih a nih lai hian police tam tak awm mah se zirlai pungkhawm thinrim hi an dang hneh lo va. Zirlaite hian relkawng luah vekin an theih ang ang an tichhia a, venhim hna thawktute nen hian a nawr pawh an innawr hle a, rel dang khawih zel an tum pawh an veng thei a ni.
Zirlaite lungawi loh chhan ber hi railways-in Non-Technical Popular Categories exam a buatsaih dan hmang a thlak vang a ni.
Railways hian exam hi thawh hniha kalpui turin an ti a. Zirlaite chuan thawh hnihna exam leh chu thawh khatna paltlang tawhte tan a fair lo hle dawn niin an sawi.
Level 2 atanga 6 inkara mi 35,000 lak tuka exam vaibelchhe 1.25 vel an awm a. Hlawh hi thla khatah Rs. 19,900 leh Rs. 35,400 inkar vel a ni.