Health Minister Dr R Lalthangliana’n Mizoramah Covid-19 hluar leh mah se lockdown kalpui erawh a rem tawh rih loah an ngai tih a sawi a, inkaihhruaina erawh ennawn a tul thu a sawi.
The Zozam Times zawhna chhangin health minister chuan tun hnaia Covid-19 kai an pun leh zel karah mipui kharkhipna thupek kalpui erawh a rem rih tawh loa an ngaih thu a sawi a, “Inkaihhruaina erawh ennawn a ngai ka ring a, hri leng hluar chho zel kara hmalak dan tur pawh chief minister nen kan sawi dun tawh a, inkaihhruaina hi chu ennawn a tul,” a ti.
Dr Thangtea chuan economy khawih buai lo zawnga mipui himna tur inkaihhruaina siam a tul tawh thu a sawi a, sorkar hmalakna kal mekte pawh a tithuanawp lo zawnga awmze neia hmalak a tul tih leh chutiang chuan an kal a rin thu a sawi.
Tuna hri leng mek chu nikum aiin a chak bik tih a chiang tawh a, chumi avang chuan mipuite an fimkhur zual a tul thu a sawi a, “Mi tin mai hi kan pawimawh a, chhungkaw tin hi kan in-lockdown thiam a ngai a, CAB hi kan zawm that chuan tuna hri leng hluar leh mek hi chu a reh leh vat theih kan ring,” a ti.
Mizoramah Omicron a awm leh awm loh an sawi theih rih lo thu Dr Thangtea chuan sawiin, “Mizorama Covid-19 kaiten eng hri ber ngei an kai tih hriat nana genome sequencing kan tihna, National Insitute of Bio-medical Genome (NIBMG), Kolkata-a thawktute hi an Covid vek mai a, sample kan thawn an endik thei lo,” tiin, eng hunah nge an endik dawn tih pawh an sawi theih rih loh thu a sawi.
NIBMG, Kolkata chu Mizoram chauh ni lo, India hmar chhak state dangte pawhin genome sequencing tih nana an hman thu sawiin, “Keini chauh hi kan ni lo a, hmarchhak state dangte pawhin sample an thawn chu an endik thei lo a, tunah chuan kan vanduai tlang a ni rih ber mai,” a ti.
Nikum October 27-a ZMC-a Genome Sequencing Laboratory an hawn chu an la hman theih rih loh thu health minister chuan a sawi a, “Thil tihfel tur a la awm a, kan la khaihlak deuh hlek a, kan hman theih vat chu kan beisei,” tiin The Zozam Times zawhna a chhang a ni.