BJP chuan Manipur assembly inthlan lo awm turah bial awm zawng zawng, bial 60 chu an chuh vek dawn tih Pathianni khan an sawi a, an party hminga chuh turte hming pawh an puang nghal.
Manipur assembly inthlan tura rorel lai party-in chuhtu tur an puan zingah hian Congress hruaitu hlui mi 10 vel, MLA ni chunga BJP zawmtu 16 zinga mite an tel.
Chief Minister N Biren Singh chu a bial vawn lai leh a chak fo tawhna, Heingang-ah a ding leh dawn a. Minister lawk zingah Biswajit Singh chuan Thongju bialah a chuh dawn a. National footballer hlui, Somatai Saiza chuan Ukhrul bialah a chuh ve thung ang.
Kum 2017 inthlanah khan BJP hian bial 21 chauh an la a; mahse, party tenau leh independent MLA-te thlawpna azarah sorkar an siam tho.
Inthlan hmasaa an MLA 21 zinga 19 chuan an chuh leh dawn a, pahnih erawh an ding zui tawh dawn lo tih BJP chuan a sawi.
Manipur BJP hian hmeichhia pathum leh Muslim candidate pakhat chauh an nei a. Manipur Congress chief thin, BJP zawm ta, Govindas Konthoujam pawh a telna party thar tana chuh tur zingah a tel.
Chief minister tana rinawm deuhte chuan inthlan hi an chuh hlawm dawn niin BJP chuan a sawi bawk.
Hmeichhe pathumte hi Kangpokpi-a ding tur Nemcha Kipgen, Chandel-a chuh tur SS Olish leh Naoriyapakhanglakpa-a chuh tur Soraisam Kebi Devi te an ni a. IAS officer thin pathumin an chuh dawn bawk.