North Korea chuan missile enchhin lehin hei hi kum 2017 hnua an missile enchhin lian ber nia hriat a ni.
An ramthuam enchhin hi khawmual pakhat atanga a dang kap phak nia hriat a ni a, vansang lam hawia km 2,000 zet a thlawh hnuah Sea of Japan-ah a tla lut.
Japan, South Korea leh United States ramte chuan he enchhinna hi demin tun thlaa missile vawi sarih an enchhinna a ni tawh.
UN chuan North Korea hi ballistic leh nuclear ralthuam enchhin lo turin a ti a, a enchhin avangin a hrek mek bawk.
Asia khawchhak lam ram hian an khapna hi a ngai pawimawh lem lo va, an hruaitu, Kim Jong-un chuan an ram invenhimna tur tihchak zel a tum.
Mi thiamte chuan tun hnaia ralthuam an enchhin tlut tlut phenah hian thil tam tak a awm an ring a. Heng zingah hian khawvela thiltithei a nih inlantir tumna bakah a bul hnai ram zingah chak ber nih a tumna a ni thei a; Kim Jong-un-a hian hun eng emaw chen nuclear chungchanga inbiakna neih loh tawh chhunzawm a nih theih nana US nawr nan hmangin engineering leh military command system lama huang an zauh dan entir a tum nia rin a ni.
An enchhin hun hi China-a Winter Olympics Games tan hma lawk leh South Korea-in March thlaa president inthlan an huaihawt hma lawk a ni bawk.
US hrekna, hripui leng leh kum tam tak chhung sum hman dan fel lo avangin North Korea ei bar dinhmun hi a chhe em em mek a, hetih lai hian an ralthuam puah an chawlhsan chuang lo.
South Korea chuan an thenawm ramin missile a enchhin hun hi an ram sanaa Pathianni zing dar 7:52 (India-a zing dar 4:22)-ah niin North Korea khawchhak vaukam atanga kah niin a sawi.
Japanese leh South Korean thuneitute chuan missile hian vansang lam km 2,000-a thui tlawkin minute 30 vel chhungin km 800-a thui a thleng niin a sawi.
US chuan North Korea hi ‘buaina lam hawi zawnga a chetna titawp turin’ a ti.
January hi North Korea-in missile programme a neiha a tul ber thla niin vawi sarih a enchhin tawh.
&&&&&