Union Budget session chu Thawhtanni atang hian tan a ni dawn a, Rajya Sabha secretariat chuan darkar 79 chhung sorkarin rorelna hun chhung a hawng dawn tih a sawi.
Hripui leng mek kara ram rorelna khawl thukhawm turah hian rorelna in hnihte chuan dan pangngaia ni khata an thutkhawm rei chhung darkar khat zel an hloh dawn.
Thawh hniha thutkhawm turah hian a thawh hmasa zawkah president thu sawi leh general budget sawiho chu a langsar lian tur a ni.
Thawhtannia a tan niah hian President Ram Nath Kovind chuan rorelna in hniha member-te hmaa thu a sawi ang.
A ni hnihnaah Union Budget 2022-23 chu Lok Sabha-ah Finance Minister Nirmala Sitaraman-i chuan a pharh dawn a ni.
Budget session thawh khatna, January 31 leh February 11 inkara neih turah hian thutkhawm vawi 10 a awm dawn a. Thawh hnihna, March 14 leh April 8 inkarah thutkhawm vawi 19 a awm thung ang.
Rajya Sabha-ah hian member-ten ram mipuite tana an ngaimawh zawng an zawn chhuahna hun, Zero Hour an tih chu ni khatah darkar chanve zela titlemin a vain darkar 13 leh a chanve hun a awm ang.
Budget session neih tur hi January, 2020 atanga hripuiin India a tihbuai hnua session vawi rukna tur a ni.
Rajya Sabha Chairman M Venkaiah Naidu chuan Thawhtanni tlai dar 5:00 hian party hrang hrang hruaitute chu ral atanga kawmin budget session neih tura sawiho tur thil hrang hrangte a sawi lawkpui dawn.
Budget session 2020 (Rajya Sabha thutkhawm vawi 251-na) kha vawi riat chauh thukhawma zawh a ni a. A vawi 252-na, Covid-19 avanga dan zam tam tak awm hnua an thut khan rorelna in pahnih kha vawi riat ve ve chauh an thukhawm bawk.
Budget session 2021, Rajya Sabha thutkhawm vawi 253-na pawh khan hripui avang bawkin vawi 10 thutkhawm zeta pawh tawi a ni.
Thawhtanni atanga Union Budget session tan turah hian a ni hnihnaa budget pharh tur atan Rajya Sabha Chairman M Venkaiah Naidu chuan a tan ni tlai lamah rorel inkhawm mumal zawka a kal theih nan all-party meeting a ko.
Meeting hi mahni awmhmun theuh atanga tel tur a ni a. Sorkar pawhin hemi niah tho hian all-party meeting a ko va, political party hrang hrangte chu budget session mumal zawka a kal theih dan tur a sawipui dawn bawk.
Sorkarin meeting a koh tur pawh hi Covid-19 leng mek avangin ral atanga tel tur tho a ni dawn a. Rorelna in hnih, Rajya Sabha leh Rajya Sabha-a political party lian tina an hruaitute chu tel tura sawm an ni.
Budget Session tan turah hian a tan nia President Kovind-an rorelna in hnih member-te hmaa thu a sawi tukah budget hi pharh a ni dawn a, hemi rual hian Economic Survey 2021-22 pawh pharh a ni ang,