United States khawchhak lam vaukam, East Coast an tih chu vur thlipui na tak leh vur tla tam takin nuaiin inkalpawhna a buai a, mi tam takin power an nei lo bawk.
State panga chuan Inrinni zing atanga vur leh thlipuiin a nuai tan hmain emergency an lo puang lawk tawh.
Massachusetts state hmun thenkhatah chuan vur hi ft 2.5 (cm 75) zet a tlain tual chhung mite tan pawn chhuah ngaihna a awm lo tih an sawi.
Thlawhna pawh 6,000 dawn kartawp chhunga thlawk tur thulhtir an ni a, Pathianni (India-a Thawhtanni zing) atang chuan ziaawm tawh tura ngaih a ni.
Khawchin thlirlawktute chuan khaw vawt takin hmarchhak lam a la tuam zui dawn niin an sawi a, vur tla hian Maine a pan leh dawn tih an sawi bawk.
Tun tuma storm an tawrh hi Nor’easter an ti a, New York leh Massachusetts chu vur tla nasa tak, tuipui kama tui lian leh vur thlipuiin a nuai.
Boston khawpui chuan Inrinni khan vur inches 23.6 (cm 60) zet dawngin hei hi a hmaa ni khata a tlak tam ber tum an chhinchhiah a tluk phah.
Inrinni zan atang khan Massachusetts-ah hian chhungkaw 80,000 chuang chuan electric an la nei lo.
Cape Cod huam chhung chu a tuar na ber zinga mi niin Provincetown khaw pum chuan Inrinni atang khan power an nei lo tawh a. Nantucket-ah vaukam hrulah tui a lian nasa bawk.
Tual chhunga khaw chin lam thiam, Matthew Cappucci chuan vur tla tam lutuk chu an buaina a nih thu a sawi a, darkar tin mai cm 8-10 vel a tlak zel avangin a harsa hle tih a sawi.
“Khawi rama kawng viltu mahin hetiang hi chu an dawl zo lo vang, kawngpui hi khar vek ngei ngei a ngai a ni,” a ti.
National Weather Service (NWS) chuan Inrinnia thil thleng hi ‘bombogenesis’ kal mek vang a nih thu a sawi a, hei hi khawmuala boruak vawt tak leh tuipuia boruak lum intawkin boruak nekna a tihdanglam thut sawina a ni a. A insiam dan kalkawng hi ‘bomb cyclone’ tiin an sawi bawk thin.
NWS chuan Boston khawpuia chengte chu rikrum thilah lo chuan zin chhuak lo turin an chah lawk.
“I chhuak a nih pawhin hmanrua, winter survival kit keng ang che. I lo tang a nih pawhin i lirtheiah tawm tlat ang che,” an ti.
Thlipui na tak, vur keng tel bawk hian khawchhak lam vaukam hi Inrinni zing khaw var hma atang khan a nuai tan a. He thil thleng avang hian kartawp hun chu heng laia cheng maktaduai telin inah hun an hman phah.
New York state hmun thenkhatah chuan ft 2 (cm 61)-a chhah vur tlain hna thawktute pawhin New York City-a khualzinte tlawh nasat hmun, Times Square bakah hmun danga tling khawmte chu khaw zing chhah lutuk avangin an la thian hleithei lo.
Vur thlipui na tak a thawk dawn tih hi US hmarchhak pumah puan lawk a ni a, hetianga huam zauva inralrinna puan hi kum 2018 hnua a vawi khatna a ni.
A kalkawngah hian mi maktaduai 75 vel an cheng a. New York, New Jersey, Maryland, Rhode Island leh Virginia state governor-te chuan emergency an puang hlawm a, mi chengte chu an sahimna turin kawngpuiah chhuak lo turin an chah.
New York Governor Kathy Hochul chuan, “Thli na tak, vur tla nasa leh vur thlipui a thawk dawn a, heng zawng zawng hi Nor’easter-in a rawn ken tur a ni,” tiin Inrinni khan a sawi lawk a. Vur a tlak tawh loh hnuah pawh khaw vawt lutukin a tuam chhunzawm dawn avangin chu chu buaipuiawm a la tling dawn tih a sawi bawk.
New Jersey-a Atlantic City police pawhin mipuite chu chhuak lo turin an ti a, Governor Phil Murphy pawhin an state-a vaukam lar tak chu thlipuiin tlawh theih lohvin a siam niin a sawi.
Connecticut-ah Pathianni thleng bus dintir a ni a, Rhode Island Governor Dan McKee chuan a hlauhawm theih avangin lei tam zawk a khar.
Inralrinna tihrik a nih laiin mi tam tak chuan vur tla lawmin an pawn chhuak a. New York-ah pawh Central Park-ah naupangte vurah tlengin Washington Square Park-ah snowball fight an ti nasa.