2022 Maruti Suzuki Baleno chu thla thar maiah hian tlangzarh tura ruahman a ni a, Maruti Suzuki Nexa dealership thenkhat chuan booking pawh an ti thei tawh a ni.
Nexa atang hian lirthei thar tihchhuah hi a khat leh ta raih mai a. Tun hi hun rei tak hnuah an tih leh vawikhatna tur a ni dawn a. A phurawm tawh viau a ni. Maruti Suzuki Baleno hi kan tarlan tawh thin angin premium hatchback lirthei huanga mi a ni a. Lirthei te lamah chuan a changkang ber class hoah a dah theih ang a, Hyundai i20 leh Tata Altroz tihte ho nena inel mek.
Maruti Suzuki chuan Baleno hi a hmelhmang tuaithar a tul leh tawhin an hria aniang chu 2022 model thar mawi tak tichhuak turin an inpuahchah mek a ni a. Nexa dealership thenkhat chuan February ni 20 velah an tihchhuah an ring a, tunah hian Maruti Suzuki Gujarat Plant-ah siamchhuah hna pawh kalpui mek tawh a ni. He lirthei tharah hian eng nge kan hmuh dawn tih kan hriat theih chen chen han tarlang ila.:
A pawn lam
2022 Maruti Suzuki Baleno rawn chhuak tur thlalak darh mek kan hmuh chuan a body panel zawng zawng hi an rawn ti thar emaw tih mai tur a ni a, a design hi mawi takin an tuaithar a ni. A hmalam atang en pawhin a hmaa chhuak aiin a lang hlai hret bawk.
A hmalam atanga thlir hian Baleno thar hian L-shaped wraparound headlamp bakah LED daytime running lamps leh projector set-up a nei dawn a, a lirthei variant azirin hengte hi a nei kimin a nei kimlo dawn a ni. A hood hi a lang phek deuh a, a hmaa a neih, clamshell design chu a la kalsan chuang lo a ni. A hmalam grille pawh a hma aiin a len hmel hret.
A sir lam atanga en chuan 2022 Maruti Suzuki Baleno hi a tuna chhuak mek nen a inang viau a. Hetihrual hian a hnung leh hma fender te erawh tih
danglam ve ve a ni. A hnung-lamah chuan 2022 Baleno-ah hian tailgate design thar, L-shaped tail lamp, a tailgate thleng awh phei leh bumper thar te kan hmuh hmel.
A chhunglam
2022 Baleno hian dashboard design thar hlak, infotainment screen pawh alai taka langsar taka dah kan a nei dawn a. Infotainment system hrim hrim hi a hmaa chhuak aiin tihchangkan a ni dawn a, wireless Apple CarPlay leh Android Auto te a nei tel bawk ang.
Maruti Suzuki chuan heads up display unit (HUD) chu Baleno tharah hian an dah tel beisei a ni a. Heng bakah hian hmanraw changkang tam tak dah tel a ni dawn a, company lam atangin an rawn puang chiang thuai tawh dawn..
Himna lam
2022 Maruti Suzuki Baleno-ah hian a top model-ah chuan a vain airbag 6 – driver leh passenger airbag bakah curtain bag te a awm dawn a. Hei hi a hnung leh hmaa passenger chuang te tan a ni. A model sanghoah chuan Electronic Stability Program (ESP) a awm tel dawn bawk.
A khawl
Baleno tharah hian a khawl chu a ngai an hman chhunzawm tir beisei a ni a. 1.2-litre petrol khawl, 83hp power pechhuak thei leh 90hp power pechhuak thei 12V mild-hybrid technology nei tel bawk te a awm hmel a. Transmission lamah chuan manual gearbox a awm bakah tuna Baleno in CVT automatic a hman mek hi AMT unit, Swift te pawhin a hman ang hian an rawn thlak beisei a ni.
A elpui tur
Lirthei te, a hnung bul (hatchback) hoa a changkang, premium hatchback huangah Baleno hi a awm a. Heti anih chuan a elpui ngai i20, Jazz leh Altoz te bakah lirthei tihchhuah thar a awm chho a nih chuan chungho nen chuan a inel ang.
Maruti Suzuki Baleno hi lirthei tha leh tlo tak a ni a. Tunhnaia lirthei secondhand tha award-ah tihchhuahah pawh ‘Best Pre-Owned Premium Hatchback Award’ a la a. Hei hi a thar tawh loh hnu thlenga a elpui te nena khaikhin pawh lirthei tha leh tlo a nih zia a tilang bawk.