- Mahmuaka Chhakchhuak
Zaithiam pakhatin Music video siam a tum a, hla nalh tak pawh a nei tawh a, music track pawh a nei tawh bawk a, ala inpeih tlat lo a, chu a la inpeih theihlohna chhan chu a thawmhnaw hak tur ala thui tir mek vang a ni. Thawmhnaw hi pathum tal hak ngai tura an sawi avangin puanthui hnenah design hrang hranga thuitir tumin an dah tawh a, thil dang zawng zawng chu inpeih vek mahsela a thawmhnaw ber an la peih loh avang chuan reilo deuh la nghah leh tur a ni. Chumi an peih vek hnuah chuan an hmun hualah chuan Pathian fakna hla sain ‘confi’ takin Music video an shoot thei dawn chauh a ni.
Hetianga inbuatsaihna hi kum tam vak lo liam ta atang vela kan buaipui a niin, chu chu kan zaithiamte chuan ngei ngei turah an ngaih phah ta em ni tih tur pawh a ni a. Chutianga ngei ngei tura kan lo ngaih laiin Manipur lam atangin Lalroutmawi chuan boruak a rawn nei a, a ni thung chuan thawmhnaw leh a behbawm lamah buai lem lo takin a zai ngawng ngawng mai a, hla pakhat a sakte pawh chuan thawmhnaw pakhat chauh hak changte pawh a nei hial awm e. A zai ngaithlaa thlirtute reng reng chuan a thawmhnaw leh a zaina hmun (background) lamah mit an len viau lo nain a zaiah chauh chuan ngaihtuahna an pe ta zawk a. A ban vai dan leh a zai hmel hrim hrimte chuan mit a lak tak em avangte pawh chu a ni ang a, kan zaithiam dang zawng zawng rawn lehpelin rang tak maiin ‘Number One’ a rawn ni ta mai a nih kha. Zaithiam dangte nena khaikhin ralah chuan Lalroutmawi zai dan chu thing tak pawh a ni thei ngei ang a, nimahsela chunglam hnathawh pawh a nih ngei rualin a ni chu a behbawma buai loin thinlung takin a zai a, chu chu a thlirtute mit la tu ber chu a ni tlat si a ni.
Zaithiam lam ni kher loah pawh mizote hian a behbawma buaina kan ngah mai a, chungte avang chuan a tak tak leh pawimawh ber laiah kan sukuk phahin kan nih tur ang kan nih loh phah fo thin. Sumdawnna kawngah ngei pawh a behbawm lam kan buaipui hmasa thinin a thil zawrh tur ber (items) ai maha kan buaipui hmasak thin zawk avangin kan beisei angin kan tluang lo a, kan teirei peih loh bawk avang tein kan tawpsan leh mai thin bawk a. Hetiang hi vawiin thlenga kan harsatna tam tak ala ni rengin kan buaina chhan pakhat hi ala ni reng thin bawk. Sangha zuartuin a sangha zawrh lai chu a hralh that theihna atan thianghlim taka a sawngbawl leh buk tling taka buk chu a hralh theihna atana a mamawh a nih laiin thenkhatte hi chuan a hmun leh hma mai bakah hmelhriat neih leh neih lohah te an lo buai hmasa thin. Sumdawnnaah hian hmelhriat neih chu a tangkai tehmeuh nain kan thil zawrh ber a that leh si loha hmelhemna engemaw alo neih chuan hmelhriat kan ngah poh leh kan mualphona a zau tihna a ni mai bawk a.
Kawng tam takah pawh hetianga a behbawma buaina hi kan ngah thinin kan thil tih leh tum ber aia buaipui hmasak hi kan nei zawk thin. Nupui pasal neih pawh hi a innei tur berte inhmangaihna chu kan duhtawk mai lo a, a behbawm thildang buaipui kan ngah lutuk avang hian buai lohna turah kan buai fo thin ni bawkin a hriat. Ropui taka inneihna buatsaih kan tum a, man eitu ruat atangin huang kan zauh a, hmeichhe man Rs. 420/- (Thenkhatte chuan Rs. 520/- an ti bawk) chu sem mai tur a nih laiin cheng sang tam tak hmeichhe manah kan han sem chhuak ta zawk thin a. Hetiang chauh la niloin chhungkhat laina hnai insuihzawmna leh inhmelhriat chian lehzualna atan tea tih a nih thin laiin keini chuan hmelhriat ni chiah lem lohte thleng thlengin hmeichhe man hi kan ni ei tir ta zel mai chu a ni bawk si a, a behbawmah hian kan buai mah mah deuh a ni awm e. Nimahsela chungte chu inneihna ti ropui tuah kan ngai tawh tlat niin a hriat a, kan bansan lawkin a rinawm bawk chuang si loh avang hian kan la che hautak zel dawn ni pawhin a hriat.
Kohhran rawngbawlna thleng pawh hian a behbawma buaina hi kan ngah ta deuh nitein a hriat bawk a, inkhawm tur ringawt pawh hian thawmhnaw nalh pangngai nen maia inkhawm chu kan hmeichhiate tan alo zahthlak lek lek tain thawmhnaw manto deuh leh puan manto deuh nen lo chuan inkhawm an lo hreh ta deuh tlat bawk hi a pawi hle mai. Lalpa pawlna atan leh thlarau lam nun tihchakna atana Biakbuk pan thin tur kan ni emaw tih laiin thenkhatte chuan an thawmhnaw neih nalhte tarchhuahna hmun leh hun atan an lo hmang emaw tih tur a ni. Pathian fakna hla satu ngei pawhin mipui hmaa thinlung taka fakna hla a sak mai chu duhtawk loin nalh taka a lan theihna turin ‘mawnglem’ vuah chu ngai zuk ti tlat bawka maw le.
Pathian rawngbawlnaahte hi chuan lemchanna lam rawngkai hi awm lo tur tak a nih laiin Pulpit thleng thlenga lemchang hreh lo rawngbawltu kan la awm zelte hi chuan Pathian hremna hi kan tawngbuak phah palh ang tihte hi a hlauhawm ngawt mai. ‘Sim rawh u, Vanram chu a hnai ta’ tia thuhriltu Baptistu Johana ang hi piangthar tawha inngaite hian kan mamawh ta viau mai em ni zawk le. Thenkhatte lah chuan nihna leh chanvote hi zahawmnaah an lo ngaiin an hming bul lama an ziah bakah an hming hnung lamah hlam chen chenin an lo ziak lang bawk a. Anmahni berin zahawm leh entawn tlak tura thiltih leh hnathawh an neih chuan siloh chuan vut laka vawih ang chauh mai an niin ropuina tur emaw tia an ziah tlarte chu anmahni timualpho zautu mai mai an ni zawk thei.
Hetianga a behbawma kan buaina thin hian rah tha chhuah tak tak nei chuang silo mahsela kan bansan thei der chuang lo a, a hautak thei ang bera thiltih hi a nghehna tur emaw tia ngai kan awm tlat si a ni. Chungte avang chuan a pawimawh ber lai hi kan lak urhsun loh phah ta niin a hriat a, a pawimawh ber hi kan hlamchhiah niin a hriat. Kan thil thiamah hian thiam chiang ila, kan thiltihnaah hian tihtakzetna nen ti thin ila hlawhtlinnna tlanga chuangkai mai tur kan ni a, hlawhtlinna chu a behbawma buaina chuan rawn zui mai zawk sela tha tur a nih laiin keini chuan buaipui hmasakah kan nei tlat si a, chu chuan hlawhchhamna khurah min hruai lut ta zawk thin chu a nih si hi.