Chawlhkar hnih zet liam hnuah Arunachal Pradesh rawlthar bo chu a chhungte nen an inhmu leh ta.
Kum 17 mi, Miram Taron-a hi Upper Siang district-a an chenna atangin China nena inrina, Line of Actual Control hrulah a bo va, ram pumah he thil hian sawi a hlawh hle.
January 18-a bo kha niin a tukah Indian Army chuan Chinese sipaite biain chhui zuipui tur leh an kawl a nih chuan pe let thuai turin an ti.
January 27 khan Chinese Army hian India a hlan a. “Chinese PLA chuan Arunachal Pradesh naupang, Miram Taron chu Indian Army kutah an hlan ta,” tiin Union Minister Kiren Rijiju chuan Twitter-ah a tar lang a. A hma ni chiahah inhlan let chu khaw awm dan mumal lo vangin a buaithlak deuh tih a sawi bawk.
Thawhtannia an ina a haw leh chuan a pa, Apun Taron chuan a fapa a hmu leh leh sorkar laipuiin him taka a kir leh theih nana an puihnaah lawm thu a sawi a. Zido khuaa an thenawm khawvengte pawhin an lawmpui hle.
“Ka haw leh ta hi ka lawm a, India Army, min duhsaka min puitute chungah ka lawm a ni,” tiin Miriam Taron-a pawhin a sawi.
“Eng emaw chang chuan khawiah nge ka awm ka hre lo va, ka bulah Chinese PLA an awm tih ka hria a, an camp-ah min hruai a. An camp-ah hian chaw pawh vawi li min pe,” a ti.
A pa chuan sorkar laipui chunga a lawm thu a sawi a, a bikin chanchinbute, an chanchin chhuaha a haw leh theih nana an nawrna tar langtute chu a fak bawk.
An khua a luh leh hian an khaw mite leh duhsaktuten an lo lawm hle a, khaw pumin a lawmna hun an buatsaih.
A tirah khan Mram Taron-a hi Chinese PLA-in an ru nia hriat a ni a. January 19 khan Arunachal East MP Tapir Gao chuan rawlthar kum 17 mi chu India ram chhung chin atangin Chinese sipaiten an ru bo niin a sawi a ni.
Gao-a hian Upper Siang district atanga ‘ruk bo’ niin a sawi a ni.
Upper Siang district hi Arunachal Pradesh-in China a rina a ni a. A mi chengten ramhnuaia sa pelh an uar hle.
China chuan an ram chhungah dan lovin a lut niin an sawi ve thung.