State pangaa assembly inthlan tur campaign ngawrh mek laiin Election Commission chuan Thawhtanni khan hri leng avangin campaign nana roadshow, Pad-yatra, thirsakawr/bike/lirthei hmanag kawng zawh leh thiltih khawm lian tham neih chu February 11 thleng a khap chhunzawm.
Poll body hian inkhuahkhirhna a kalpui mek thenkhat erawh a thlahdul ve hret tho va, campaign dan leh thutkhawma tel thei zat pawh a tipung.
A hmaa mi 500 aia tam tel theih lohna, political party emaw, candidate-in emaw hmun ualauva inkhawm a kohvah mi 1,000 tel phal a ni tawh.
Commission pawhin in tin luta campaign lamah pawh phal zau hretin mi 10 chauh tum khata kal phal chu mi 20-ah a tipung a. Hetah hian venhim hna thawktute chu chhiar tel an ni dawn lo bawk.
Inthlan buaipuitute hi hriselna lam buaipuitute leh inthlan hmabak state pangaa inthlan buaipuitute nen inrawnin, Covid-19 darh mekin ziaawm lam a pan hret avangin hetiang hian inkhuahkhirhna hi a thlahdul hret a ni.
“State chief secretary zawng zawngte chu commission hian Covid-19 an dinhmun leh an derthawn dan a zawt vek a. Endik atanga a kai hmuh zat bi (positivity rate) chuan hniam lam panin damdawi ina awm ngai pawh an tlem a, a kai hmuh chhuah pawh an tlem hret hret hlawm a ni,” tiin thuchhuah an siamah a tar lang.
Election body hian in chhunga inkhawm pawh a thlahdul hret a. A hmaa mi 300 chauh inkhawm phal kha tunah chuan mi 500 aia tam lo a ti tawh a, an inkhawmna ina leng zat zahve inkhawm theih a ni bawk.
Chief Election Commissioner Sushil Chandra chuan thlahdul hret mah se hri leng dinhmun hre renga a tidarh lo zawnga che turin political party-te a ngen a ni.
India rama state lian leh mihring tamna ber, Uttar Pradesh Legislative Assembly inthlan chu February 10 atanga March 7, 2022 chhung hian thawh sarihin an inthlang dawn a, bial 403-ah inthlan a ni ang.
Punjab Legislative Assembly-a thu tur mi 117 chu thawh khatin February 20, 2022 hian thlan a ni dawn.
Uttarakhand Legislative Assembly inthlan chu February 14, 2022 hian thawh khatin an thlang ang a. Tlangram state-ah hian bial 117-ah inthlan hi an nei dawn a ni.
Hmarchhaka Manipur Legislative Assembly pawh thawh hnihin, February 27 leh March 3, 2022 hian an inthlang dawn a, mi 60 thlan chhuah tur an ni ang.
Goa Legislative Assembly chu February 14, 2022 hian an inthlang dawn bawk a, member 40 thlan an ni ang.
Kum 2024-ah Lok Sabha inthlanpui a awm dawn avangin tun tum inthlan hi semifinal anga ngaih a ni.