Aizawl khawpui chhung bika kum thar, 2022-a khaw vawh ber lai chu January 29 a ni a. Record tawh china khaw vawh lai ber erawh a la thlau deuh niin a lang.
State Meteorological Centre, Directorate of Science & Technology chhinchhiah danin, Aizawl bikah kumina khaw vawh lai ber chu January 29, zing dar 5:22 vel kha niin, khaw vawh dan tehnaah 8ºC a ni. Hei hi ni khata khaw vawh lai ber (daily minimum temperature) ni bawkin, January 2022 chhunga ni tina khaw vawh lai ber zel chawhrualin 13.1ºC a ni.
Kumin chhunga khaw lum lai ber chu January 8, 2022, chawhnu dar 1:55 vel kha niin, 23ºC a ni a. Hei hi ni khata a lum lai ber (daily maximum temperature) a ni a, kumin January thla chhung bika nitina khaw lum lai ber zel chawhrualin 19.2ºC a ni.
Ni khat nilenga khaw lum leh vawh dan (daily average temperature)-ah chuan January 28, 2022 kha a vawt ber a, 11.0ºC a ni. January thla chhunga ni tina khaw lum leh vawh dan chawhrual (monthly average of daily average temperature) chu 16.2ºC a ni.
Kum kalta, 2021-a khaw vawh ber lai chu January 23 leh January 25-ah te niin, khaw vawh dan tehnaah 9.0ºC-a vawt a ni a. Tun kum 10 kalta chhunga khaw lum leh vawh dan chawhrualin 21.17ºC a ni.
Kum 1985 atanga Aizawl khawpui chhung vawh leh lum dan chhinchhiah tawh chinah, khaw vawh ber chu January 13, 2017 niin, 2.7ºC a ni a. He mi kum vek hi a lum ber tum ni bawkin, April 13, 2017 khan 36.5ºC a ni.
Mizoramin kumina thlasik khaw vawh vanglai a tawng chho mek a, hemi avanga room heater leh power supply heh chi hman nasat a nih avangin transformer leh electric hmanraw thenkhatten a zo lo a, power supply a khaihlak phah thin.
P&E department hotute chuan khaw vawh avanga power supply heh chi hman nasat a nih avangin transformer leh electric hmanraw thenkhatten a zo lo thin a, veng hrang hrangah power supply khaihlak a awm phah thin tih an sawi a, thawktuten zan rei tak tak thleng siam thin mah se inen chhawk a ngaih phah thin tih an sawi.
Nimin khan Zuangtui 132kV Sub-station-ah PGCI Sakawrtuichhun Sub-station atanga power lakluhna 132kV Circuit Breaker a puak a, hei vang hian nimin khan Aizawl khawpui chhungah power supply a khaihlak nasa hle a, tlai lam atangin power hi sem darh leh tan a ni.
Thudawn danin Circuit Breaker chhia hi ni khat thila thlak mai theih a ni lo va, hun remchang hmasa berah shutdown lain thlak a ni ang. Nimina power supply a awm loh rei avang hian mobile phone leh internet-ah mi tam takin harsatna an tawk hman.