Myanmar tual chhung buaina kal zelah hmun thenkhat a ralmuan loh zual avangin tun hnaiah Mizorama tlanchhia an pung zel.
Kar kalta Inrinnia Zokhawthar chhak lawk, Khawmawi khaw daia People’s Defence Force (PDF) leh Myanmar sipai an inkah avangin Khawimawi, Haimual leh khaw dang mipui mi thahnem tak chu Mizoram chhung, Zokhawthar leh a chhehvel khaw dangah an tlan lut.
Zokhawthar khawtlang hruaituten The Zozam Times an hrilh danin, niminah pawh Zokhawtharah raltlan an luh belh zel a,tun ni hnih khata luh belh hi 3,000 bawr vel an tling tawh.
Raltlan awm sa mi 1,300 nen mi 4,300 bawrvel Zokhawtharah raltlan an awm mek a, awmna mumal nei lo an awm nual.
Myanmar ram chhung hmun thenkhat a ralmuan loh leh tak avang hian ramri dep khuaah raltlan an luh belh zel a. Hriat theih chinah Inrinni tlai atanga nimin tlai thleng khan Hruaikawnah raltlan thar 16, Melbukah 304, Bulfekzawlah 47 an luh belh.
Hnahthial district chhungah pawh raltlan an luh belh zel a, nimin tlai thleng khan Thingsai-ah leh Pangzawl South-ah mi pang ve ve an lut a. District pumah raltlan mi 1,452 an awm mek a, an zingah hian chhunga 327 an tel a ni.
Tun hnaia ramri depa raltlan lut tharte chungchang ngaihvena zirchiang turin Champhai Addl DC Henry C.Lalrawnkima leh sorkar mi pawimawh dangten Zokhawthar leh Melbuk khua an tlawh.
Raltlante chungchang zirchianga a tul anga hmalak zel dan tur ngaihventu sorkar mite hian raltlante puihna tur hmanraw mamawh angte pein, chhawmdawlna dangte pawh a tul ang zela buaipui an tum thu an sawi.