HRISELNA HUANG
Omicron hripui karah eng mask nge i vuah ang?
- Robert Zoliana
A KHUH HAWNNA
Omicron hripui thar nena kumthar kan luh chhoh hnu hian inkaichhawn awl lehzual he hripui hi mi tam takin an kai ta sup sup mai a. Delta variant ang lo takin Omicron virus hi thil hote mai pawha inkaichhawn awlsam tak a nih vangin fimkhur zual a ngai.
Hmaichhana inbiakna ah te, khuh leh hahchhiau adt. thleng pawhin virus hi a tlang zung zung thei. Invenna mask tha tak vuah erawh chuan inkai chhawn theihna a hniam hle thung.
Kum 2020 atang tawh khan hripui vangin nunphung thar kalpuina kawngah kan harh chhuah viau tawh laiin, mask quality tha lo leh han en mai pawha him lo tih hriat ngawih ngawih nena khawi lai leng hmuh tur an la tam.
Booster dose kalpui a nih hnu pawh hian a tul fe loh chuan pawn chhuah tam loh a him tho tho a, loh theih lohva chhuah a ngaih pawhin mask tha leh rintlak tak nen lo chuan chhuah loh ngam a tha.
Engpawhnise, a hnuaiah hian mask i vuah dawna ngaihtuah hmasak tur leh duhthlanna i siamna kawnga tanpui thei tur che pathum chhawpchhuahsak i ni dawn e, Heti ang hian:
N95, KN95 emaw KF94
Heng te hi khawvel huap pawha mask tha leh hmantlaka pawm a ni tawh a, uluk taka vuah a nih chuan hmanraw tha tak tak hmanga siam mask ah hian virus luh theihna chance a tam lo. Venhimna kawngah 95% thlengin a thawk thei. Hmai tuam chung paw’n inkar hlat ngaihpawimawh tho tur.
Surgical mask
Hmanraw tha pangngai tak hman a ni a, particle lian leh te thleng paw’n himna tha tak a pe thei. Mahse, heng mask te hian hmai hi a tuam fuh twk loh thin avangin a lerah hian hmunruak a siam thin a, chuvang chuan double hman mai pawh a sual lovang. Heti anga a thuaha hman anih hian thawhhah leh tháwk lama harsatna nei tan paw’n remchanna a thlen thei. (N95 mask hi tha viau mah se, thâwk lam harsatna nei tan a buai-thlak châng a tam)
Cotton mask
Heng hi tháwkkhat lai khan fashion ang deuha hman lar leh vuah thin a ni a, amaherawhchu amah ngo ngo chuan a him lo. Surgical mask nena thuah erawh chuan awmzia a nei thung. Puan (cotton) nena siam te hian droplet lian deuh te veng thei mah se, a te lam deuh venhimna kawngah erawh an thawk tha lem lo. Chuvang chuan, cotton mask vuah dawn reng rengin ngaihtuah nawn fo a tul ang.