Lungleia Myanmar raltlan chungchang nimina sawihonaa telten, “Raltlante chu kan unaute, kan lo mikhual tur leh kan lo buaipui zel tur ni mah se, India khua leh tui nghet an nih theihna tura kohhranin document nghet – nau hlanna emaw, Baptisma certificate emaw pe chhuak lo tura kohhran hote ngen ni se,” an ti.
Myanmar raltlan chungchang sawihona, YMA Sub-Hqrs., Lunglei kaihhruaiah hian Lungleia kohhran hrang hrang leh political party aiawhte an tel a. Presbyterian kohhranin raltlan zingah an fate nau hual leh Baptisma an chantir theih loh bakah, raltlante chu sorkarin dan anga a pawm a nih loh chuan kohhran member nghet tura an lakluh theih loh thu an sawi a. Baptist kohhran leh Roman Catholic pawhin member ngheta an pawm theih rih loh thu an sawi laiin, UPC erawhin Baptisma, nau hlan chu an theih thu leh tualchhung kohhran kuta an dah thu an sawi thung.
He thutkhawma telte chuan raltlan zingah nau nei thar an awm pawhin Birth & Death registrar ten lo register lo tur leh birth cerficate pawh lo pe chhuak lo tura Dist. Reseach Officer, Economic & Statistics deptt. hnena ngen chungchang te, political party pawh electoral roll-a thun lo tura hmalakpui tura ngen chungchangte an sawi bawk.
Sub-Hqrs YMA, Lunglei Secretary Zothanzuala Hnamte-in he thutkhawma a report danin Sub-Hqrs YMA, Lunglei huam chhungah Myanmar raltlan 1,042 awm tawhin, YMA Sub-Hqrs., Lungleiin Lungleia YMA branch 21 hnenah raltlante chhawmdawlna tur Rs 1,80,000; Hnahthial dist-a Tuiphai Group YMA hnenah Rs nuai 1.5 a pe chhuak tawh.
CYMA atanga raltlan mi pakhat tan Rs 700 zela an dawn thu leh mi 153 hnenah pek a nih tawh thu sawiin, Zothanzuala Hnamte chuan naupang erawh telh an nih rih loh thu a sawi a. Lunglei bawrhsap pisa atang pawhin raltlan mi pakhat zel hnenah Rs. 300-in mi 304 tan tanpuina pek chhuah a ni tawh tih a sawi.
Thaizawl khuaa raltlan mi 594 hnena ei tur pek a nih thu leh Chawngte, Phairuangkai leh Vanhne-a awmte pawh mi pakhat zelah Rs 300-a tanpuina pek an nih thu Sub-Hqrs YMA, Lunglei secretary chuan a sawi.