Central YMA chuan Thawhtanni zan khan Central YMA Hall, Tuikhuahtlangah kum 2021-2023 YMA kum puan ‘Ram leh Hnam Humhalh’ hawnna inkhawm an buatsaih.
Kumpuan hawngtu Rev MS Dawngliana chuan ram leh hnam humhalh tulna te, humhalh dan turte a sawi a, “Kan ram chin chin fel hi kan politician leh ram hruaitute tih tur a ni a, tuna kan ram leh hnam, min thlenpui chinah hian hmasawn kan la ngai, ram leh hnam tung ding thei tur politician leh hruaitu ramin a mamawh a ni,” a ti.
Rev MS Dawngliana chuan dan dik loa hausakna te, Pathian tel lo a hausaknaten Mizoram a rûn mek tih sawiin, Pathian duh dana rorelna leh thil tih chu ram leh hnam din chhuahna tur a nih thu leh zu leh ruihtheih thil hrang hrang chu hnam hmelma a nih thu a sawi.
Kumpuan hawnna hi CYMA President R.Lalngheta’n a kaihruai a, General Secretary Prof. Lalnuntluanga’n report a pe a ni.