Pumao, Longding district, Arunachal Pradesh-a kawngpui siamnaa thawk mi pathum chu NSCN (K-YA) hel pawl nia hriatten an ru bo.
Venhim hna thawktute chuan heng mite hnu hi an chhui zui mek a, zau takin an dap.
Tangruala beihpui thlakin Arunachal Pradesh leh Myanmar inrina lai vel dap a ni.
Police-in an sawi dan chuan ruk bote hi Pumao Langkhow Road siama thawk niin an hna thawhna bula awmhmun an khuarna atanga ruk bo an ni.
An pathum hian Nyasa, Nagaland-ah hruai an ni a. An zinga pakhat, Langkhao khua, Longding district-a cheng, Bangphua Wangpan chu an chhuah leh mai a, mi dang pahnih erawh an la kawl zui.
An la kawlte hi Hiren Konch (excavator operator) leh Ramasish Mahato, Jalpaiguri, West Bengal-a mite an ni.
Helho hian an inkhuarna hmuna mobile phone leh lirthei chabi pawh an la a, hei vang hian inruk bona a thleng tih pawh hriat har niin Thawhlehni tlai khan hriat a ni chauh.
An hnathawhpui dangte chuan hla taka police awmte chu thil thleng hi hrilh turin kein an kal a ni.
NSCN(K-YA) hi Longing district-ah hian an chetla nasa hle a, thla eng emaw zat kal ta atang khan sumdawngte hnenah pawh pawisa an khawn thin.