Tonga ram chuan tun hnai lawka khuarel chhiatna rapthlak tak an tawrh hnu lawkah an khawpui, Nuku’alofa-ah Covid-19 kai hmuh an nih nual avangin an inkharkhip zui dawn.
Prime Minister Siaosi Sovaleni chuan Thawhlehni khan lawngchawlhnaa hna thawk pahnihin hri an kai tih a puang a. A hnu lawkah thuneituten an chhungte pathumin an kai tih an sawi zui.
South Pacific ram hi a hma zawng kha chuan hri leng laka fihlim ram an ni.
Tun hnaiah tlangkang nasa tak leh tsunami tuarin mi pathum an thi a, chenna in leh thil dang tam tak an chân bawk a. An chhiatna tawh laka thawh chhuah leh tuma Tongan-te hian an bei mek laiin inkharkhip an ngai ta a ni.
Tonga hian Covid-19 laka an him theih nan hian an ramri pawh kum 2020 tir lam atang khan an khar a ni.
Khuarel chhiatna an tawh takah khan ram dang puihna an mamawh a, a bikin tui in tur, tawmhulna tur leh chhanchhuahna hmanrua an mamawh zual.
Ram dang atanga puitute pawh hian hri an tihdarh lohna turin intawk kher lova puihna inhlan dan an zawm a. Tongan-te nena an thawhho hmain ni thum chhung an awm hrang zel bawk.
Australia, New Zealand, United States, China, France, Fiji and leh UK te chuan an mamawh phurtu lawng an tir hlawm.
Vanduaithlak takin kar hmasa khan Austalia lawng, thliarkar ramin a mamawhte phurtu, HMAS Adelaide chhunga hri hi darhin thawktu eng emaw zatin an kai.
Lawng hi an khawpui lawngchawlh hmunah dintir a ni a. Tongan sorkar chuan an rama hri a darh ve chhan a ni thei em tih an chhui a; mahse, he lawng atang hi chuan ni theiin an ngai lo.
Australian Defence Force operations chief pawhin Nilaini khan hri kaite hi lawngchawlh hmunah pawh hmun dang daiha thawk an ni a, an lawng leh thliarkar rama mite kai hi inzawmna nei theia a hriat loh thu a sawi.
“Covid-19 darh loh nan, inkhawih lovin, fel taka Tongan thuneitutenena inremin kan inhlang thla a ni,” tiin Lieutenant General Greg Bilton chuan Sky News Australia a hrilh.
Lawng hian Tongan mi hri kaite sample hi hawn nghalin Australian damdawi inah endika eng variant nge an kai tih leh eng ram atang nge tih hriat an inbeisei.
Thawhlehni zana thuchah a sawiah Sovaleni chuan Covid-19 kai an awm ve tak thu leh Tonga chu Nilaini tlai dar 6:00 atanga inkharkhip a nih tur thu a sawi a, darkar 48 dan zelah an ennawn tur thu a sawi bawk.