North Korean hruaitu, Kim Jong Un-a nupui, Ri Sol Ju chu thla nga dawn vantlang hmuh tura a inlar tawh loh hnuah a inlan veleh ta niin an sorkar chanchinbu chuan a tar lang.
Roreltute chhungkua hi coronavirus avangin an pawn chhuak tam lo hle.
Kim leh Ri hi Pyongyang khawpuia Lunar New Year lawmna inkhawm pakhata art performance-ah an kal dun niin sorkar enkawl KCNA news agency chuan a tar lang.
Ri-i hi vantlang zinga hmuh hnuhnun ber chu September 9 daih tawh kha niin a pasal nen Kumsusan Palace of the Sun an tlawh a. He hmunah hian Kim-a pu leh a pa ruang zalh a ni a, an ram dinchamah an tlawh duh a ni.
“Kim-a hi a nupui, Ri Sol Ju nena theatre-a auditorium an luh hian rimawi tiriin nasa taka lo lawm a ni a, mipuite pawhin ‘Hurrah!’ tiin an lo lawm a ni,” tiin KCNA chuan a sawi a. Show zawhah hian an nupa hian dawhsanah chhovin show neitute chu chibai an buk a, thla pawh an la ho bawk.
Ri-i hian tun hma deuh, Kim-a pa, Kim Jong Il-a a chawlh tirh lam kha chuan vantlang thiltih, sumdawnna leh sipai lam thilah an pa hi a tawiawm nasa thin hle.
A hnu lamah erawh kum chuang zet inlan lo zuiin nikum February khan concert ennaah a inlan veleh zawk thung a. A inkhung chhung hian a hriselna tlahniamin nau a pai nia rinna a awm.
South Korea-a National Intelligence Service chuan tun hnaia a inlan tam loh chhan hi chu COVID-19 a kai lohna tur niin an ram hruaitute hnenah an sawi a, ‘a fate nen erawh inah hlim takin an awm’ tiin an sawi.
Spy agency hian Kim leh Ri nupa hian fa pathum an nei niin an hria a; mahse, finfiahna emaw, a ni ngei emaw tia finfiahna tur a awm lo.
North Korea-ah hian COVID-19 kai an la awm miah lo nia sawi a ni a; mahse, an ramri an khar a, zin veivah pawh khauh taka khuahkhirh a ni.
North Korean hruaitute chhungkua hi an inthup hle a, hei vang hian First Lady Ri Sol-ju-i chanchin pawh hi hriat thui tur a tam lo hle a. Hriat chin tam tak pawh hi rinthu, finfiahna chiah awm hleithei lo a ni hlawm.
Kum 1985 leh 1989 inkar vela piang ni tura ngaih a ni a, kum 2008-a Kim-a pa, Kim Jong Il-a a stroke thut khan innei tura remna siampuiin kum 2009 khan an innei nia hriat a ni.
Fa pathum an nei nia hriat a ni a, a upa ber mipa leh a dawttu hmeichhia nia hriat a ni a. A naupang ber erawh eng mi nge a nih pawh hriat a ni lo.
Ri-i hi chhungkaw hausa, an rama a pasala pain ro a rel laia a kawmngeih tak takte nena inchhung hnai nia hriat a ni.
A nu hi an ram gynecology ward hotu leh a pa professor nia hriat a ni.