Aizawl district chhungah sorkarin a chhinchhiah lem lohvin Myanmar raltlan mi 5,000 bawr vel an awm mek nia hriat a ni a, veng leh khuaah raltlante buaipui tur committee din a ni dawn.
Nimin khan Aizawl District Level Committee on Myanmar Refugees chu an chairman, Bawrhsap Dr. Lalhriatzuali Ralte hovin an thukhawm a, chhinchhiah lem lohvin Aizawl district-ah hian raltlan mi 5,000 vel awm nia hriat a nih thu tar lan a ni.
He thutkhawma an tar lan danin, Aizawl district-ah refugee camp pali – Synod Revival Camping Center (SRCC), Neihbawih; Sports Council Hostel, Mualpui; Sairang leh Sihhmui te a awm, heng Camp-ah te hian raltlan 480 an awm mek.
Thukhawm chuan Aizawl district chhunga raltlante chhiarpui neih dan turte an rel a, VC/LC tinah VCP/LC chairman-na hnuaiah NGO-te puihbawmnain Village/Local Level Committee on Myanmar Refugees din a rel a, he committee hi din fel a nih hunah raltlante chhiarpui hi neih tur a ni.
Heng bakah hian raltlante ID pek chhuah dan tur te, ei leh bar, zirna, hriselna chungchang te bakah a tul ang zela refugee camp sak belh dan turte an rel a, sorkarin raltlante tuamhlawmna tura sum a pekte hman dan tur an ruahman bawk a ni.