Aizawl Municipal Corporation (AMC)-in sorkar kum kal mek 2021-22 atana Property Tax an khawn mekah Rs nuai 276 chuang an hmu tawh.
Sorkar kum kal meka AMC-in Property Tax atanga sum an hmuh tur zat an bituk chu Rs nuai 350 a ni a, an target atanga chhutin tuna an hmuh tawh chin hi zaa 78.85 a ni.
AMC hotute chuan Property Tax hi an la khawn mek thu sawiin, local council 83 zinga pasarihin tax an khawn khawm tawh sa AMC-ah an la chhun luh lo thu The Zozam Times an hrilh a, hemi hi a luh khawm hunah chuan tax an hmuh chu a pung deuh tura an ngaih thu an sawi.
Property tax chhutna atan Aizawl khawpui chhunga building zawng zawng survey hna an thawk mek tih sawiin, “In sak dan te, in len zawng te, a hman dan te, a sak zawh kum te kan chhinchhiah zel,” an ti.
AMC hotute chuan in neitu zawng zawngte Property Tax an pekna receipt hnuhnung ber leh neitu an nihna lang thei document, lo inring theuh turin an ngen tih an sawi a, veng danga in neite pawhin a luahtute hnenah hnutchhiah tura an ngen thu an sawi.
Property tax hi kum 2015-16 atang khan khawn tan a ni a, hemi kum hian Rs 1,14,18,172 hmuh a ni a, 2016-17-ah Rs 2,20,03,716, 2017-18 Rs 2,57,52,799, 2018-19-ah Rs 2,84,70,000, 2019-20-ah Rs 2,98,94,000 leh kum kalta 2020-21-ah Rs nuai 324 hmuh a ni.