Thil dang nena pawlh cocaine an tih avangin Argentina khawpui, Buenos Aires leh a chhehvelah mi 20 vel zet an thi a, damdawi inah mi 74 an awm mek bawk niin thuneitute chuan an sawi.
Chhuitute chuan phal loh ruihhlo hi eng tûr emaw nena pawlh a nih loh pawhin thil dang, mihring huat tak thil nena pawlh a nih an ring.
He thil thlenna biala security minister chuan cocaine ti thin, darkar 24 liam ta chhunga leitute chu an thil lei paih vek turin a ngen.
Heng ruihhlo hi khaw daia in awm that lohnaa chenkhawmna (shanty town) pakhat atanga hralh chhuah vek nia hriat a ni a, mi pakua man an ni tawh.
Chhuitute chuan mitthite post-mortem examination report an nghak mek a, mi an mannaa ruihhlo an mante nen an thiltih chu a inang em tih finfiah an tum.
Thihpui leh damlote hi khawpui huam chhunga Hurlingham, Tres de Febrero leh San Martín district-a mite vek niin damdawi in 10-ah dah an ni.
Hurlingham-a damdawi in tualah chuan police car ruak ding chu thi zinga pakhat chhungten an suasam niin tual chhung chanchinbu chuan a tar lang.
San Martín-ah chuan police-in thi mi pali – Hernán Castro, 45, Martín López, 36, Dino Melgarejo, 33, leh Fernando Yacante, a kum zat hriat loh, te chu an hre chiang tawh tih Buenos Aires Times chuan a tar lang.
Mi pakhatin police hnenah cocaine hi Puerta 8 shantytown, Tres de Febrero-a mi pakhat hnen atanga an lei a nih thu a thlen hnuah an leina hmun hi dap a ni.
An dapnaah hian thi zinga pakhat chhungten an chhung thi ta an lak, cocaine infun dan ang chiah an hmu hlawm.
Buenos Aires province Security Minister Sergio Berni chuan, “Dealer-te hian cocaine hi an chan sawm thin a. Thenkhat chuan thil hlauhawm loh, starch nente an ti a. Thenkhat erawh chuan hallucinogen an telh a, hetiang hi chu thihna a ni,” a ti.
Ruihhlo an chan darhnaa thil tha lo telh hi drug-trafficker inel tak takte kara intihchhiat nana tih a ni thin tih a sawi bawk niin AFP news agency chuan a tar lang.
Thuneitute chuan an mi rinhlelhten cocaine an chan darh nan hian thluak hnathawh timuang thei thil an hmang niin an sawi tih agency chuan a tar lang.
San Martin Attorney-General Marcelo Lapargo chuan he thil hi tihpalha thleng nia an hriat loh thu a sawi ve bawk.
Thite hi an taksa awm dan a inlet but but a, heart attack-in an thi zui ta mai nia ngaih a ni.
Cocaine (hydrochloride) hi ngaih (addict) awlsam tak ruihhlo niin coca thlai hnah atanga siam a ni a, a titute hian a tlangpuiin an hip/hnip thin.
Kum 2019-a report siamah chuan Argentina hi America rama mihring cheng zat azira cocaine ti nasa ber niin United States leh Uruguay dawtah a awm.