China chuan June, 2020-a Ladakh khawchhak, Galwan Valley-a India sipaite leh an sipaite an inphek sualnaa thi zat nia a sawi chu a dik lo hle niin Australian chanchinbu, ‘The Klaxon’ chuan a tar lang a. Sipai pali chauh chân anga an insawi chu dik lovin a let kua vel zet, sipai 42 an chân zawk niin a tar lang.
Report thar hi social media researcher pawl pakhatin an siam niin chanchinbu hian a chhuah chhawng.
June 15-16-a inphek sualna a thlen tum khan Chinese sipai 38 vel zetin Galwan River luang chak tak kân an tumna lamah chesualin tuiin a la niin kum khat zet an chhui hnua an chhui chhuah dan an tar lang a. Sipaite hian lui hi tui khang theihna khawpa vawt leh zan thim hnuaiah kân an tum niin an tar lang bawk.
Chhuitute chuan China hian a sipai pali chauh thi angin a sawi a, an zinga pakhat, Junior Sergeant Wang Zhuoran chu tuiin a la niin an sawi tih an tar lang a. A chhuitute hian ‘Galwan Decoded’ tia report an siamah an hmuh hi an tar lang a ni.
Report-ah hian ‘Weibo hmangtu tam tak’ chuan ‘PLA (People’s Liberation Army) sipai 38 zet, Wang-a pawh telin, tui lianin zanah a la a, an zingah Wang-a chauh hi sipai pali thi anga tar lanah a hming hi tar lan a ni,” an ti.
“Sipai thuam famkim nena thawk chhuakte hi an tawlh a, tuiin a la zui,” tiin report chuan sawiin, “Heng thil a thlen hnuah hian sipaite hi Shiquanhe Martyr Cemetery-ah lak an ni a, a hnuah an khua theuhvah vui an ni,” a ti bawk.
China-a an social media, Weibo hmangtu pakhat, Qiang an tih, inbeihna thlenna lai vel hnaia awm chuan Chinese sipaite hian hmun ralti lai (buffer zone)-ah thil an bun a, ram pahnih inrem siamna an bawhchhia a, buffer zone-ah hian an patrolling-na thin hmun chu April, 2020 atang khan zauh tumin hma an la tan niin a tar lang tih report-ah hian ziah lan a ni.
“PLA hian an inremna angin an thil lo siam tawhte bak chu intiamna dang tihhlawhtlin an tum lo va, a rukin Indian Army-in lei an siam chu an thiat zawk,” tia tar lan a ni.
Beijing chuan Galwan Valley-a an sipaite leh India sipaite insual chungchangah khan engmah a sawi tam duh lo va, a bikin an sipai thi leh hliam zat phei chu a puang chiang duh lo.
The Klaxon chanchinbu chuan Xinjiang Miltary Region division khat chuan officer leh sipaite chu Shiquane Martyr Cemetary-a kala martarte zahna pangpar dah tur leh an thlan thlenga thlah turin a tir niin a tar lang bawk.
Galwan Valley inbeihna chhuitute hian Chinese blogger langsarte an kawm kual a, Chinese-ten thu an inpek kualna vela thu darh leh chanchinbuten an chhuah, thuneituten an paih (delete) lehte lakhawmin thil thlen dan hi an chhui a ni.
Inbeihnaah khan India chuan a sipai 20 a chân niin a insawi a, kha inbeihna kha kum 1962-a ram pahnihte an indo hnua an intihbuaina lian leh ber a ni.