C Lalawmpuia (Maawma), Dawrpui, Aizawl chuan cycle hmanga Kolkata thleng kal turin kumin January 26 (Republic Day) zing dar 5:30 khan Aizawl chhuahsanin, kawng lakah a thang mek.
Aizawl atanga kilometer 1,500-a hla, Kolkata thleng cycle hmanga kal a tum chhan tam tak zingah – hnam dangten cycle hmanga khawvel fangin, Mizoram rawn thleng pawh an awm leh zauh thin, hnam dangte theih ang hi Mizote pawhin an thei ve a ni tih lantir chu a tel thu The Zozam Times a hrilh a. Mizo mipate hriselna a tha tawk lo emaw tih tur khawpa chhan hrang hrang avanga Mizo mipa mual liam an tam lutuk chu chona petu zingah a tel thu a sawi.
C Lalawmpuia chuan Mizo pa tam tak zingah kum 40 ral an kaia upa ta riaua inngaihna awma lang thin chu Pathianin mihring a din dan a nih loh thu sawiin Pathian duh dana nuna taksa tana tha lote laka insum chuan kan la chak viau thei a ni tih lantir chu a tum pakhat a nih thu a sawi.
Mizorama adventure sports lam chawi lar pawh a thil tum zingah a tel thu C Lalawmpuia chuan a sawi a. January 26, 2022 zing dar 5:30-ah Aizawl chhuahsanin, Silchar leh Shillong-ah ni khat ve ve a chawlh hnuah Guwahati pan lehin, February 2 khan Guwahati a thleng a, Kolkata a pan zel dawn.
C Lalawmpuia hi kum 2016 atanga cycling lama inhmang tanin, cycle hmangin Mizoram hmun hrang hrang a tlawh tawh a. Kum 2018, October khan Aizawl atanga km 500 chuanga hla, Phawngpui tlang pawh cycle hmangin a lo tlawh tawh.
Mizo zingah cycling lama hmasawn leh tumruh an awm zel a. Vanlallawmzuala Varte, Mission Veng, Aizawl chuan nikum khan Mizoram hmar tawp, Vairengte atanga chhim tawp, km 655-a thui, India, Myanmar leh Bangladesh inrina lai, Parva chu ni sarih chhungin a lo tlan thleng tawh bawk.