Hming thar a pu dek dek a, awngrawp lam a pan ta emaw tih mai turin Facebook neitu Meta Platform chu stock market-ah $Billion 230 aia tamin a hlutna a tla hniam ta a, US firm tan a pawi vawng vawng, tih a ngai.
Share a neih te pawh a tla duai duai bawk a, investor lamin an hmu tui lo nge ni dawn, quarter hmasa khan 26.4% in a tla hniam.
Meta chuan lunghnur takin nitina Facebook hmang nasa tute an kiam zel tih a puang bawk a, hei hi kum 18 hnu lama an thil tawn vawikhatna niin, lungchhiatthlak an ti hle.
Bloomberg Billionaire Index tarlan danin, $Billion 31 vel zetin an hotupa Marck Zuckerberg hau-sakna a tla hniam bawk a, chumi awmzia chu a tlak hniam hnua a hausakna hi Estonia ram kumtin GDP nen a inzat tihna a ni.
Facebook chanchina active user te kiam duak vawi-khatna ah hian khawvela social media inpui lian ber tan ngaihuah tur leh insiamthatna tur tam tak a awm tih a chiang reng.
A hmasa berin, a elpui lian tak ni mek TikTok leh YouTube te ram zauh a na tawh a, Facebook-ah advertiser te’n sum lian tham vawmluh an hreh tual tual bawk nen, a manganthlak.
Mr Zuckerberg enkawl Meta company chuan a bik takin thalai leh kum lama naupang zawkte’n TikTok leh YouTube lama an kal dual dual tak vangin sum leh pai lamah tlakchhiatna runpui an hmachawn mek, tih thlengin an pha lo.