Arunachal Pradesh Chief Minister Pema Khandu chuan Buddhist sakhaw biakzinten an tlawh thin, Tawang-a Ngangpa Natme (Buddha Park)-ah feet 104-a sang India Hnam Puanzar a pawt pharh a, hei hi hnam puanzar dahna sang ber dawttu a ni a, feet 10,000 zeta sangah a ni.
China nena inrina bul lawk khuaa hnam puanzar a pawh pharh hnuah Khandu chuan hnam puanzar dah chu an state-a hnam leh ram hmangaihtute zawng zawng puala tih a nih thu a sawi.
Indian Army, Sashastra Seema Bal, Indo-Tibetan Border Police, Tawang district thuneitute leh helai bialtu MLA Tsering Tashi te tanghovin hetiang thil an puitlin thei chu lawmawm a tih thu a sawi bawk.
“Feet 104-a sang hnam puanzar hi Arunachal-a ram hmangaihtute tan kan hlan a, vawiin khan Ngangpa Natme (Buddha Park), Tawang-ah kaih pharh a ni,” tiin Khandu hian Zirtawpni khan Twitter-ah a tar lang.
“Feet 10,000ft-a sangah niin hnam puanzar hi Tawang khawpui zar hliahtu a ni a, kan rama hnam puanzar zarna sang ber dawttu a ni,” a ti bawk.
Union Law Minister Kiren Rijiju pawhin thlalakte chu Twitter-ah a tar lang chhawng ve bawk.
“Tawang, Arunachal Pradesh-a feet 10,000-a sangah Hnam Puanzar feet 104-a sangah zar a ni,” a ti.
Arunachal Pradesh chief minister-in ramri hnaih taka hnam puanzar a pawh pharh hi China nena Line of Actual Control hrula inruk bona thleng nia sawi avanga boruak a len lai taka tih a ni.