Kum 2021 chhungin Thenzawl Golf Course & Resort tlawhtu inziak lut mi 15,319 an awm a, mikhual thlen man atangin Rs 76,78,338 hmuchhuah a ni.
Mizoram Tourism Department chhinchhiah danin, Thenzawl Golf Course & Resort tlawhtu hi kum kalta, 2021-ah January khan an tam fal hle a, mi 4,897 tlingin heta tang hian Rs 8,51,810 hmuhchhuah a ni a. Hetih lai hian, February thlaah hian tlawhtu inziak lut hi January thla aiin tlem zawk mah se, sum lak luh erawh a tam zawk thung a. February thla hian mi 2172 in an tlawh a, heta tang hian Rs 15,08,260 lak luh a ni.
March thlaah mi 1887 in an tlawh atangin Rs 9,05,580 hmuhchhuah a ni a. April thlaah hian tlawhtu mi 1,009 awmin, heta tang hian Rs 8,00,140 hmuhchhuah a ni.
Inkharkhip avangin May, June leh July-ah sum lak luh a awm lo thung a. Hetih laiin, June thla bikah hian a enkawlna atan Rs 27,140 sen a ni.
August thla hian inkharkhip hi thlahdul a nih hnuah tlawhtu mi 212 an awm a, hemi hnu hian kum tawp lamah tlawhtu pung leh hretin, September-ah mi 491 awmin, hemi thla hian Rs 4,78,692 lakluh a ni a. October thla hian tlawhtu mi 690 awmin, Rs 6,23,937 hmuhchhuah a ni a, November hian tlawhtu pung leh hretin 1091 an awm a, Rs 10,30,320 hmuhchhuah a ni a. December thla hian tlawhtu 2667 awmin, Rs 14,79,400 lakluh a ni bawk.
Thenzawl Golf Course & Resort hi August 2021 khan hawn tan niin, hawn a nih kum hian tlawhtu 4515 an awm a, tlawhtu atangin Rs 5,30,400 hmuhchhuah a ni a. Kumin, 2022 January thla hian thlawhtu mi 1621 an awm a, Rs 5,66,040 hmuhchhuah a ni tawh bawk.
Toursim department hotute sawi danin, Thenzawl Golf Course & Resort enkawlna atan hian thla khatah hian cheng nuai 16 bawr vel hi senso a ni thin a. Hetih lai hian, kum khat chhung atan hian Finance Department hnenah July 2021 khan Rs 30,05,243 an chhung lut a ni.