India rama a ruka luh tum Pakistani pathum vel chu Inrinni zan leh Pathianni zing khan Border Security Force (BSF) sipaiten International Border hrul, Samba sector-a Bainglard-ah an kap hlum.
BSF DIG SPS Sandhu chuan, “Sipaiten phal loh tawlh ruk tum an awm tih hriain pathum an kap hlum a. Heroin packet 36 an lo keng a ni,” a ti.
Ralthuam leh puak thei dang an hmuh tel loh thu a sawi bawk.
“BSF IG hovin Bainglard kan thlen hunah chiang zawkin chanchinbumite hnenah puan a ni ang,” a ti.
Heng mi pathum kah hlum hi Pathianni zing dar 2.30 vel kha a ni.
January 5 khan BSF hian km 198-a thui Indo-Pak International Border kânin Pakistan Ranger-ten ralthuam, puak thei leh ruihhlo tawlh ruk tumte an nawr nasa niin an sawi a. Hei hi sector commander-level-a Suchetgarh-a ram pahnih ramri vengtute inbiaknaah sawi chhuah a ni.
India lam hi Surjit Singh, DIG, BSF chuan hovin Pakistan lam hi Brigadier Fahd, Sector Commander, Pakistan Rangers, Sialkot Sector-in a ho ve thung.
He inbiakna hi kumina sector commander-level-a an inbiakna hmasa ber a ni.
Inbiaknaah hian commander-te hian ramri venhimna chungchang thil tam tak an sawi a. BSF lam atanga telte hian Pakistan-a innghatten International Border kâna ruihhlo leh ralthuam an tawlh nasat thu an sawi.
BSF hian Pakistan-in drone hmanga India rama thil a thawn luhte pawh an duh loh thu an sawi a. Ranger-ten International Border hnaih taka awmna tur an siam leh Pakistan lam atanga a ruka India thil tawlh chungchangte an sawi.