Hri leng laka fimkhur zual sauh sauh a tul
Hri lengin reh lam a pan hlei thei lo a, kai thar sangbi an awm leh nitin bawk. Kan fimkhur loh luatah kan pherh nek ang tih hlauhawm tak a ni. Mitinin mawhphurhna kan nei a, kan lo hlau lo viau a nih pawhin midangte tibuai lo leh tihlauthawng lo zawng tala awm i tum tawh teh ang u.
Covid-19 chungchanga sorkar thupuangtu, Dr Pachuau Lalmalsawma chuan, “Hri leng mek hian a vanglai a la thleng lo niin a lang a, hri kai hi an la pung chho zel dawn niin a lang,” a ti a. Covid-19 leng hi mipuiah lak zam tumna a awm nia a lan thu sawiin, “Hritlang satliah anga sawi tawkte an awm a, in-test duh lote pawh an awm nia hriat a ni,” a ti a; hei hi hri tidarhtu a nih a hlauhawm thu a sawi bawk.
Kan damdawi lam thiamte pawh an mangang a, khawvel pawhin a manganpui natna a la nih miau avangin lo lak zam ngawt hi kan tih tur a ni lo tih hriat thar kan ngai hle mai. Kan ram chhung ngeiah pawh mi tam takin nunna an lo chan phah tawhna a nih miau avangin hlau ila, fimkhur ila, kan inven thiam a, midangte tihlauthawng lo tur tala pawn chhuah loh kan zir thar lehte pawh hi ngai tawh tak a ni.
A kaihhnawih natna dang omicron a lo la chhuak leh zel a, kan ram atangin a endikna hmunah sample engemawzah thawn ni ve mah se, an thawnna laboratory lamin covid an kai avanga an endik theih miau loh avangin kan ram chhung ngeiah pawh omicron hi a awm tawh reng ang em tih a hriat loh a, lungmuanga thu thei kan ni la ni lo. Fimkhur zual sauh sauh kan ngai zawk tih hi i hre thar fo ang u.