Delhi chief minister, Aam Aadmi Party (AAP) national convenor ni bawk, Arvind Kejriwal chuan Thawhtanni khan Uttarakhand assembly inthlan lo awm tura an party-in hnehna an chang a nih chuan ‘Hindu-te tana thlarau lama khawvel khawpui berah’ an siam tur thu a sawi.
Kejriwal-a chuan Hindu-te thlarau lam khawpuia Uttarakhand an chantir a nih chuan tourism lamah nasa taka hlawkna pein chu chuan thalai sang tel hna a pe dawn tih a sawi.
Haridwar-a thuthar lakhawmtute a kawmnaah Kejriwal chuan, “Uttarakhand hi Hindu-te tan khawvel puma an thlarau lam khawpuiah kan siam dawn a. Hei hian khualzin a titam ang a, thalaite tan hna a siam bawk ang,” a ti.
Kejriwal-a chuan biakzinte tana tlawh nuam tur leh tlawh chakawm hmuna siam a tiam a. “Darshan of Ayodhya ji hi Uttarakhand mipuite tan kan siam ang a. Muslim-te chu Ajmer Sharif-ah an lo kalkhawm ang,” tiin Delhi-a hetiang an siam ang chu an siam tur thu sawi.
Delhi chief minister chuan Delhi-a ‘Mukhyamantri Tirth Yatra Yojana’ an ruahman chuan ram pumah sakhaw hmun tlawhtu mi 40,000 chuang a siam thu a sawi bawk.
Uttarakhand assembly inthlan tur chu ‘chhinchhiah tlak’ tia sawiin Kejriwal-a chuan inthlak danglamna lian tak a thleng dawn tih a sawi a. “Ei rukna tibo thei turin he state-ah hian a vawi khat nan sorkar zahawm tak a siam theih a ni,” a ti.
AAP hotupa chuan hmeichhia kum 18 chin chung lamte chu thla tin an mamawh lei nan Rs. 1,000 pek ziah a tiam bawk a. “Heng pawisate hi an bank account-ah thunsak an ni ang,” a ti.
Uttarakhand hi state dang pali rualin February 14 hian an inthlang dawn a. March 10-ah vote tlate hi chhiar a ni ang.