Manchester United in tunhnai kum 10 chhunga player lakluh nan a sum sengral hnem ber an ni a, Euro tluklehdingawn 1 chuang player lakluhnan an hmang tawh.
Switzerland a independent research group CIES Football Observatory chuan zirchianna a kalpuiah United hian kum 2012 a\angin Euro tluklehdingawn 1.075 player lakluh nan a seng ral tawh a. Player lei nan Euro tluklehdingawn 1.545 hmangin player hralhnaah Euro maktaduai 470 an hmu let a, an sen ral erawh a la sang hle.
Hlawhtlinna a lei
theih loh
United hian tunhnai kum 10 chhungin league title vawi khat chiah an la a, chu chu 2012-13 season khan niin an manager ropui Sir Alex Ferguson-a season hnuhnung berah a ni.
Hemi season \an dawn hian Arsenal a\angin striker Robin van Persie chu Euro maktaduai 28 in an chhuhsak a, hei hi player lei nan a sum hlawm lian an hman a hlawhtling hnuhnung tiin a sawi theih.
Ferguson thlaktu David Moyes hnuaiah Maruane Fellaini leh Juan Mata te lei nan Euro maktaduai 77 a belhkhawmin an seng a. Louis van Gaal hunlaiin manto takin Angel di Maria leh Anthony Martial te an lei bawk.
Premier League chanchin a player manto ber ni turin kum 2016 khan Paul Pogba chu Euro maktaduai 105 in an lalut a, tun season zawhah a man tel lovin a chhuak dawn a ang mek zel.
Striker Romelu Lukaku chu Euro maktaduai 89 in an lei a, defender Harry Maguire (€95m) leh Jadon Sancho (€86m) te erawh club-ah an la awm mek.
Red Devils hian kum 2017 a Jose Mourinho hnuaia Europa League trophy an chawi bak engmah an la chawi leh lo.
Tute nge langsar dang?
Premier League champion lai Manchester City chu pahnihna an ni a. Anni hi sum seng hnem ber nimahsela player hralhnaah an hmuh let hnem avangin United aiin an sum hmanral a tlem.
Euro tluklehdingawn 1.699 player lei nan an hmang a, an hralhna lamah Euro maktaduai 715 an hmu let thung.
Paris Saint-Germain chu pathumna niin Euro maktaduai 914 an hmang ral a. Spanish club Barcelona chu palina niin Euro maktaduai 650 hmang ral an ni a, an sum dan an tihsual leh hrileng in club a nghawng avangin an insiam\hat a ngaih phah a, an star player Lionel Messi an chelh zui theih loh phah.
Panganaah Arsenal awmin Euro maktaduai 583 an hmang ral.
Premier League club-te sum che vel a sang
A sang panga zingah Premier League club pathum an awm a, top 20 zinga club 14 erawh Premier League a khelte vek an ni.
A sang 10 zingah Everton (€429m), Aston Villa (€424m) leh Chelsea (€413m) te an tel a. West Ham United, Liverpool, Newcastle United, Tottenham Hotspur, Crystal Palace, Leicester City, Brighton & Hove Albion leh Wolverhampton Wanderers ten sum an seng ral hnem vek.
Sum hmu let tamte
Sum hmangralte an len laiin Europe league lian panga zingah sum hmu let tam zawk club-te zingah hming langsar an awm ve nual.
French club LOSC Lille chuan Euro maktaduai 349 hmu letin player leina aiin hralhnaah sum an hmu hnem zawk a. CIES zirchianna a hmu hnem ber an ni.
Olympique Lyonnais chuan dawtin Euro maktaduai 247 an hmu let.
Hmu let tam fal zingah Italian club pathum, tunhnaia hmasawn tak Atalanta bakah Udinese leh Genoa te an tel a. Spanish club zingah Basque khaw club, Basque rawngkai chauh chhawr \hin chunga La Liga club \ha zinga mi ni thei Athletic Bilbao an tel.
German club hlun Borussia Dortmund pawh sum hmu let hnem zingah hian an tel a, Westfalenstadion-ah club inenkawlna \ha an neih an chhawr hle.
Top 10 list :
Club Spent Earned Net spend
Manchester United €1.5bn €470m €1.1 bn
Manchester City €1.6bn €715m €984m
PSG €1.4bn €504m €941m
Barcelona €1.6bn €980m €650m
Arsenal €1bn 446m €583m
Juventus €1.5bn €981m €561m
AC Milan €884m €452m €432m
Everton €911m €482m €429m
Aston Villa €701m €277m €424m
Chelsea €1.6bn €1.2bn €413m