Chief Minister Zoramthanga’n raw hmun siam tam chu kang mei venna nia a hriat thu sawiin, sorkar laipui hotute hnena raw thiar chhuahna tur Bamboo Link Road project chungchang a hrilhfiah pawhin kangmei venna tha ber chu bamboo link road a nih thu a lo aupui tawh tih a sawi.
He thu hi nimina Fire Prevention Week 2022 Aizawla a hawnnaah a sawi a. Zorama chuan kangmei chhuak tam tak chu lo halna atanga chhuak a nih avangin ram nghet neih a tul tih sawiin, “Rua emaw, kuhva emaw, rubber hmun emaw a kang dur dur lo,” a ti.
Bamboo project an kalpuiah pawh mau te reuh tete chin lam ni loin, raw lian pui pui chin tum a nih thu sawiin, raw lian hnuai chu a thelh thulh a, kangmei chhuak tur a awm lo tih a sawi a, “Sorkar laipui hotute hnena raw thiar chhuahna tur Bamboo Link Road project chungchang ka hrilh fiah pawhin kangmei venna tha ber a nih thu ka lo aupui tawh,” a ti.
Ram leh in lama kang mei laka invenna project siam a tul a tih thu CM chuan sawiin, “Chung project chu nuai tam tak sen ngai lo turin kan siam ang a, Delhi tlang lamah kan kalpui ang,” a ti.
Forest Minister TJ Lalnuntluanga pawhin thu sawiin Forest Survey of India (FSI) report-in Mizoram pum chhutin zaa 28.28 chu kangmei chhuah hlauhawm berna hmunah puangin, zaa 49.73 chu kangmei chhuah hlauhawmna leh kangmei chhuah hlauhawm lohna chu zaa 2.2 chauh a nih thu a sawi a, hemi avang hian sorkar pawhin kangmei ven chu a ngai pawimawh tih a sawi.
He huna an tar lan danin FSI chhinchhiah danin January, 2021 atanga nimin thleng khan Mizoramah ram kang hi hmun 12,726-ah hmuh a nih a, spot verification report angin November, 2020 – May, 2021 chhunga ram kang hmuh chu hmun 4,486 a ni, chu chu ram hectare 14,153.08 vel a ni.
Hemi kang atang hian hmun 205 chu sorkar ramngaw kang niin hmun 4,281 chu vantlang leh mi mal ram kang, bawlhhlawh hal leh lo hal atangin a ni.