ZPM Leader Lalduhoma, MLA chuan wine zawrh leh siam khap tur rawtna awm chu cabinet ennawn leh a phut a, an kaltlangpui a nih chuan grape chingtuten eizawnna danga an pakai leh theihna khawp ruahmanna an siamsak ngei an phut tih a sawi.
Lalduhoma hian nimin khan thuchhuah siamin, Cabinet Sub Committee-in wine zawrh leh siam khap tura thutlukna a siam chu cabinet-in ennawn leh se an an duh thu sawiin, “Sub-Committee thu hi an kaltlangpui dawn a nih pawhin zangnadawmnate pein, eizawnna danga an pakai leh theihna khawp ruahmanna an siamsak ngei kan phut,” a ti.
ZPM leader chuan Food Safety & Standards Authority of India chuan wine hi food item-ah a dah a, winery pawh hi Food Processing Unit-ah a ngai tih sawiin, zu leh wine chu tehna thuhmuna teh chi a nih loh thu a sawi.
Grape chin tan a nih dan leh sorkar hriatpuia chin a nih dan sawiin, “Grape hi kum 2005 atang khan eizawnna thama chin tan a ni a, tunah hian Hnahlan leh Champhai velah chhungkaw 750 velin an ching mek a. MLTP Act 1995, Section 70-na hnuaiah Mizoram Excise & Narcotics (Wine) Rules, 2008 siamin sorkar hriatpuia chin a ni,” a ti.
Hnahlan leh Champhaia grape chin chu sorkarin a tuipui a, society an din dawn pawhin an bul tan nan MIP hnuaiah Rs nuai 166 a pe tih sawiin, technical mission hnuaiah fermentation tank te, a lawhna tur plastic cratee, cold room, damdawi, leitha leh a zamna tur GI Wire pein a tanpui reng thin tih a sawi.
Grape chingtuten hlawhtlinna an hmuh zel dawn thu ZPM leader chuan sawiin, Champhai Grape Growers’ Society-in kum 2010-21 inkar kum 11 chhungin Rs 17,06,04,323 man an thar chhuak tih leh kum 2012-13 leh 2015-16 inkar chhungin Excise duty Rs 13,62,539 an chhun lut thu a sawi bawk.
Duhoma chuan Champhai leh Hnahlana grape wine siam chu Mizoram pawnah pawh hralh chhuah a nih zel thu sawiin, wine an siam chhuah zinga Isabella chu December, 2021-a Pragati Maidan, New Delhi-ah Food Innovation Exhibition-ah ken a ni tih a sawi a, “Hralh a kal hle dawn nia hriat a ni,” a ti.
Grape chingtuten hlawhtlinna an hmuh dante a sawi bakah excise minister-in grape chingtute hamthatna an ngaihtuah tur thu leh kohhrante nen pawh MoU an ziak tawh tih chanchinbua tar lan a nih dante a sawi bawk a, lo neituten phur taka hma lam an pan mek laia Cabinet Sub-Committee chuan thutlukna lungchhiatthlak tak mai a siam ta thut mai chu hlim taka nuihtir thintu an huante chu tah tichhuaktu an lo chang zo ta tih a sawi bawk.