India rama vawiina tlang-zarh tur Hollywood film, ‘Death on the Nile’ chu a changtunu Israeli actress Gal Gadot hmel telin, Kuwait-in a ram chhunga tihchhuah a khap ta bur mai.
Kuwait sorkar information ministry thupangtu Anouar Mourad chuan social media lamah he film chhuah khap tura ngenna leh nawrna a nasat tâk vangin ramchhunga chhuah loh mai chu tha zawkah ngaiin, thutlukna an siam ta a ni, a ti.
Social media-a a lan danin, Gadot hian 2014 kuma Gaza indonaah khan Israel sipaite nasa tak fakin, Palestinian chet dan erawh a dem hle thung a ni. Kha indona ah khan Palestinian lamah mi 2,251 thiin, a tam zawk hi civil mi an ni. Israel lamah mi 74 an thi a, a tam zawk sipai an ni thung.
Gadot hi 2017 kuma Hollywood film hit tak, ‘Wonder Woman’ atang khan lemchan khawvela hriatlar ni chho in, filmstar ngaihvenhlawh ber zingah a lang pha. Israel mi a nih vangin he film hi Arab ram thenkhatah tihchhuah an khap bur a ni.
UAE, Egypt, Bahrain leh Arabs ram thenkhatte’n Israel nena thawhhona leh inlaichinna an neih chhoh mek laiin, Kuwait hian ban a phar chhuak ve duh ngai lova, Palestinian te dikna leh chanvo auchhuahpui reng-in, Israel kawmserh hna a thawk chhunzawm zel.