Majumdar-a kha buhfai supply-tu lian niin a lar leh mek : Zodintluanga


Congress Legislature Party (CLP) leader Zodintluanga Ralte chuan nimina Mara District Congress Committee (MDCC) huaihawta vantlang inkhawm a hmanpuinaah thu sawiin, “Tun hnaia Mizoram chief minister-te nena New Delhi lama chawhlui kilho tia lar tak, Abu Majumdar chu Mizoramah buhfai supply-tu lian tak niin a lar leh mek,” a ti.
Saiha Bazara vantlang inkhawmah kuhva sumdawnna chungchang sawiin, “Mizoram buaipui ber chu Burma-a kuhva sumdawnna a ni. MNF sorkar hi a ngawi tlat a. Hmanni lawkah Assam chief minister leh kan chief minister New Delhi-ah chaw an ei khawm a, ‘high level meeting’-ah chuan chief secretary leh home secretary te nen an tel thin a. Kan CM-te inhmuhkhawmnaah chuan kuhva tawlhtu lian nia hriat lar, Abu Majumdar an tel niin media lamah tar lan a ni thung,” tiin, hemi chungchanga MNF party-in insawifiah an tumna lamah Abu Majumdar hi New Delhi Mizoram House lama thlen a tum thute an tar lang ta hial niin a sawi.
MPCC Treasurer Zodintluanga Ralte hian state pahnih chief minister-in chaw eia sawm zawk tihte pawh inpuhtawn a ni ta mek tih sawiin, “Amaherawhchu, thil chiang tak mai chu, he Abu Majumdar hi Congress sorkar laia lo lang ngai lo, MNF sorkar vela buhfai rawn supply-tu lian ber mai hi a ni,” a ti a; Mizoramah tun ministry atang hian buhfai ‘supply’ hna nasa taka a thawh thu pho lan mek a nih thu a sawi.
Chief minister sawi tam ber, rua/mau an chinna hmun an tlawh tumin a chingtute an beidawn avangin kuhvaten an lo thlak tih an hmuh thu a sawi a. “Sum siam nan ringawta rua/mau hman hi a beidawnthlak a ni. Engati nge SEDP programme-ah CM atchilh bur mau/rua chin hi an telh loh le? A sorkar hnathawk leh a minister-te hian an ring tawk ve lo a nih hmel,” Congress MLA hian a ti.
SEDP sem turah khawia sum nge an la sawi loh thu leh nikum budget-ah an dah loh thu a sawi a. Vawiinah lo vah a ni a, thlai chin a hun vek tawh a. An sem tura pawh an la thlang mumal thei lo a ni a, inthlan dawn apianga mipui bum nan SEDP an hmang tih chu Serchhip leh Tuirial bye-election atanga a lan chian tawh thu a sawi.
“Mipuite hi sawr fu tur kan awm tawh lo a ni, chhiah an tipung a. Tui leh electric bill an tipung reng ringawt a ni. Mipui tan hmasawnna a awm thei tawh lo, an hotupa ber atangin a chhungkhat hnaite hna lian ber berin a vur a. Hei vang hian a naute Minister leh MLA te pawhin mahni inhaivur an ngaihtuah ta ringawt mai a nih hi,” CLP leader hian a ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427