Muslim hmeichhiaten zirna ina lu an tuam duh leh duh loh boruak kal zelah Karnataka-a khaw pathumah boruak a tan zual leh avangin police-in flag march an nei.
Police hian flag march hi Udupi, Chitradurga leh Doddaballapura khawpuiah te an nei.
Flag march hi Karnataka High Court-in lu tuamna khap chungchanga petition a dawn ngaihtuah tura a tih ni chiahah neih a ni a. High court hian Zirtawpni khan thutlukna lailawk siamin sakhaw lam thil, puanbah emaw, lu tuam emaw pawh, zirna in chhunga tih a rem lo niin a sawi.
Lu tuamna chungchanga buainaah hian ni thum chhung sikul leh college khar kalpui mek a ni a. Udupi-a sorkar college pakhata lu tuam khap a nih atanga buaina kal zel hi state chhung hmun dangah a kang kai a ni.
Lu tuam khap thlawptu zirlaite chuan nghawngbah serthlum rawng nen sikul an kai ve thung a, college pakhata tharum thawhna thlengah police-in mittui tlakna hlo hmangin pung khawmte an hnawt darh hial.
Supreme Court chuan Zirtawpni khan lu tuam buaina chungchang hi hmanhmawh taka ngaihtuah tura ngenna chu a hnawl a, ‘a hun takah ngaihtuah a ni ang’ a ti a. Karnataka-a zirlai hmeichhe pakhatin court sang berah a thlen a ni.
Supreme Court-a petition thehluttu zirlai hmeichhia hian February 15-ah mai practical exam an tan tawh dawn a, tuna buaina leh zirna in khar hian an zirnaah nghawng nasa takin a nei niin a sawi.
Hetih lai hian Karnataka-ah tho, Davanagere-ah thil duhawm lo tak a thleng bawk nia sawi a ni.
Hindu pa pakhat chu Muslim mipa rualin social media-a thu a tar lan avangin an sawisa nia sawi a ni a. Dileep Malagimane-a hian hliam a tuar a, damdawi inah enkawl mek a ni tih police chuan an sawi.
A thil tawn chungchangah hian thubuai ziah luh niin mi pali man an ni tawh.
Police chuan kut an thlak chhan, social media-a thu a tar lan hi a dik lo va, chi leh sakhaw inkara buaina chawk chhuak thei niin an sawi.
&&&&&&