SEDP chu mipui hnena thleng tak tak loin MNF-ten inthlan apianga mipuia an zawrh mai a nih thu MPCC Treasurer Zodintluanga Ralte chuan a sawi.
Mara District Congress Committee (MDCC)-in nimin khan Tipa (Tuipang)-ah vantlang inkhawm an huaihawtah thu sawiin Zodintluanga Ralte chuan, “Tunah pawh SEDP sem turin an rawn zuar leh ang, hei hi Mara Autonomous District Council (MADC) inthlan a hnaih avanga rawn hmatheh leh mai mai an ni tih lo hre tawh rawh u. Kum 2018-ah nuai thum an zuara tunah chuan cheng sing nga a ni an hotupa berin a sawi leh tak hi,” tiin, bye-election apiangin SEDP sem tura an sawi thu leh a taka mipui zawng zawng huap hmuh tur vawiin thlengin a la awm loh thu a sawi.
Congress Legislature party (CLP) leader chuan MNF chu Mizorama chhiatna thlentu an ni tih sawiin, “MNF hi an ropui lai berin kan ramah harsatna kan tawk thin a. Rambuai atanga Mizo mipui chhanchhuaktu chu Congress party bawk a ni a. An ropui lai bera Mizo mipuiin kan tawrh avangin an sorkar hmasak tum khan Aizawl khaw daiah hel camp-te a awm a, mipui kan ralti a, eirukna mak tak tak thawm a awm a, mipuiin kan tuar,” a ti.
Zodintluanga Ralte chuan, “Kum 2018-a an rawn sorkar khan kan sum hnutchhiah kha tam an ti khawp mai; mahse, a ngaihna an hre lo a, sum tam tak hnutchhiah kha hmang zoin mipuiin harsatna kan tawk a, sorkar hnathawkte hlawh a huna pek a ni lo a. Sorkar hnathawk pawisa khawl GP Fund te an la thei lo a, pensioner-ten pension benefits a kuma kum an la thei loa an mangang nasa hle,” a ti bawk.
Sorkar tha leh dik siam turin Congress party chuan Lalsawta an neih thu leh chief minister atana an duan chhuah a nih thu a sawi a. Mizoram sum enkawl thiam kaihhruai leh sum dinhmun siam tha leh turin Congress party hi kum 2023 atan an inpuahchah mek thu a sawi.
BJP chungchang sawiin Zodintluanga Ralte chuan, “BJP chu Mizo hnam leh sakhaw kalphung nena inkalh tlat a nih avangin Mizoramah engtikah mah a sorkar ngai dawn lo, mahni sahmim tihpuar nan ringawt i um lo vang u. India ram central-ah pawh takin a tlahniam mek tawh,” a ti.
Thusawitu dang, Lalrindika Ralte, MLA chuan mipuite tana beisei tur awm miah lohna sorkar kan hrawn mek nia a hriat thu a sawi a. Congress party hian sorkar tha, mipui mamawh phuhruktu, mangangte tluk luhna tlak an din tur thu sawiin, “Hun kal tawhah khan tih dik loh tam tak kan lo nei tawh ang tih hi kan pawm a; mahse, insiam that kan tum,” tiin, ram leh mipuite thlamuanna sorkar din an tum a, khua leh tui tute tan pawh beisei tur a awm tur thu a sawi ve bawk.