Nicaraguan hel hruaitu hlui, Hugo Torres-a chu thla riat kal taa an ram sorkar laka hela puhna avanga man a nih hnuah, a tanna inah kum 73 mi niin a thi.
Army general hlui hi tuna an ram president ni mek, Daniel Ortega nen hian an ram revolution hun lai khan nasa taka bei dunin Ortega hi tan in atangin kum 1974 khan a chhuah phah.
A hnuah erawh Ortega hi dictator (mi mala thuneihna neitu) anga puhin amah ep turin party a din.
Nikuma an ram inthlanpui neih dawna eptu hruaitu lawk man eng emaw zat zingah a tel leh a ni.
Sorkar chuan Torres-a hi a hriselna dinhmun a hniam zel avangin damdawi inah lak a ni a, eng natna ber nge a thihpui hriat lohvin a thi tih a puang.
A fate chuan pa an chân chu an rilru a nain hrehawm an ti a, an tuar tak zet tih an sawi.
Torres-a hi kum 1970 chhova Anastasio Somoza-a’n amaha an ram a hruaia nasa taka a duh dan dana an ram a sawp dodala mipui rorelna ram a nih theih nana mipui helna, Sandinista Revolution an tihah an ram pasaltha zinga pakhat a ni.
Somoza-a hun laia man, Ortega chhuah a nih theih nana beihpui thlakna hautak leh hlauhawm takah pawh a tel a, a ruahman deuh vek a ni.
Hetih lai hian nikum June thlaa hel pawla tel thin mi 46 man zingah Torres-a hi a tel ve a, hei hi Ortega sorkarin amah eptute a hmehmih tumna niin sawisel pawh a hlawh hle a. Heng mite hi Ortega-a’n inthlan an chuh theih lohna tur leh a zawna term li an ram a hruai theih nana tih a ni.
Kum 1995-a Ortega nena an inthen hnua amah ep tura din, Unamos-a vice president a nih laiin Torres-a hi ‘ram inpumkhatna tichhe tura a ruka phiartu’ anga puh a ni.
Unamos chuan Torres-a hi man a nih hnuah ‘taksa leh rilru lamah nasa taka sawisak’ niin an sawi a. Party hian a hriselna a tlakhniam zel avangin chhuah lailawk mai turin sorkarah an dil a; mahse, sorkar hian a ngaihthlaksak lo.
UN High Commissioner for Human Rights Michelle Bachelet chuan Torres-a hian ‘mihring tih dan kalpui lo ang taka inchhuah chu a duh lo va, dan ang takin, engmah intiamkamna awm lova chhuah a duh’ niin a sawi.