State pangaa assembly inthlan neih tur kal zelah Thawhtanni khan ngaihven hlawh ber, Uttar Pradesh-ah chuan district pakuaa bial 55-ah mipuiten vote an thlak leh a, hei hi an inthlana a thawh hnihna a ni a. Hetih rual hian BJP rorelna state dang pahnih, Goa leh Uttarakhand-ah vote thlak a ni bawk.
Chhun dar 1:00 thleng khan Uttar Pradesh-a bial 55-a vote tla hi 39.07 a ni tawh a. Uttarakhand-ah 35.21 leh Goa-ah 44.63% a tla tawh.
Uttar Pradesh bika inthlan thawh hnihna neihna zinga bial riat, Bijnor, Sambhal leh Saharanpur district huam chhunga awmte chuan ngaihven a hlawh zual a. Heng bialte hi Samajwadi Party thatna thin hmun niin Muslim tamna a ni.
Goa leh Uttarakhand hi thawh khat chauhva inthlang tur an ni a. Goa-ah hian bial 40 awmin Uttarakhand-ah hian bial 70 inchuh a ni thung.
Uttar Pradesh-a bial 55 zinga 38 zet hi inthlan hnuhnung ber, kum 2017-a BJP chakna kha niin SP-in bial 15 changin Congress-in bial hnih an chang ve bawk.
Uttar Pradesh inthlan thawh hniha chuhtu langsar zingah SP hruaitu hlun Azam Khan leh Dharam Singh Saini te pawh an tel a. BJP minister thin, SP zawm ta, finance minister thin, Suresh Khanna pawh a tel.
Azam Khan hian a lo chak fo tawhna, Rampur bialah chuhin tun tumah hian lung ina tang chungin inthlan hi a chuh.
Uttarakhand-ah hian Chief Minister Pushkar Singh Dhami leh a cabinet zinga Satpal Maharaj, Subodh Uniyal, Arvind Pandey leh Dhan Singh Rawat te pawhin inthlan hi an chuh a. Congress chuan chief minister hlui, Harish Rawat leh state Congress chief Ganesh Godiyal an dintir a. Arvind Kejriwal-a kaihhruai Aaam Aadmi Party chuan Uttarakhand-ah hian inthlan an chuh ve bawk.
Tlangram state-ah hian Chief Minister Dhami leh a nupui chuan BJP symbol chuanna nghawngbah bat chunga polling booth an tlawh avangin model code of conduct bawhchhiaa puh an ni.
Tuipui kama bial 40 awmna, Goa inthlan pawhin ngaihven a hlawh a. He state-ah hian kum 2017 khan Congress chu MLA ngah ber ni mah se BJP-in party dangte nen sorkar an siam.
Tun tumah hian Kejriwal-a kaihhruai AAP leh Mamata Banerjee kaihhruai, Trinamool Congress pawhin Delhi leh Bengal-a huang zauh nan an chuh ve.
Goa-a bial ngaihven ber chu Panaji a ni a. He bialah hian BJP chief minister thin, Manohar Parrikar-a fapa, Utpal Parrikar chuan independent-a dingin BJP dintir, Atanasio Monserrate chu a khing a. Congress chuan sorkar officer lawk tak thin, Elvis Gomes dintirin AAP chuan kum 2017-a chief minister atana an vawrh chhuah, Valmiki Naik chu a vawi thum nan an dintir thung.
Trinamool Congress chuan nghet takin Goa-ah bu an khuar niin an insawi a. AAP pawhin kum 2017 inthlana bial khat mah an chan loh hnuah tun tum atan chuan an inbuatsaihna a tha tawk tih an sawi.