Aizawl East I bialtu MLA, Chief Minister Zoramthanga’n nimin khan a bial chhung Tuirial tlawhin MNF zawm thar mi 53 a lawm lut.
MNF, Aizawl East-1 South Block-in thuchhuah siama an tar lan danin, Zoramthanga hian Tuirialah VC member, Congress party Zohmingthanga chu MNF-ah lawmlut a, hemi rual hian Congress leh ZPM atanga MNF zawm thar mi 49 a lawm lut bawk.
Congress ticket-a thlan tlin VC member pakhatin MNF a zawm tak avangin Tuirialah hian MNF Village Council thar a piang dawn tih leh chief minister bial chhunga LC leh VC zawng zawng MNF party kaihhruainah hnuaiah a awm ta vek a ni tih an thuchhuahah chuan an tar lang.
Zoramthanga lo dawngsawngtu khawtlang hruaitute chuan an khuain mamawh hrang hrang an neihte an lo thlen a, Tuirialin telephone tower an neih theih nana Reliance Company neitu, Mukesh Ambani hnenah DO letter thawna a dilsak chu reilo teah hman theih tur a peih a ni ta chu lawmawm an tih thu bialtu hi an lo hrilh a ni.
Aizawl East I bialtu MLA hian Tuirial leh Airfield venga in hmun nei lo chhungkaw 90 hnena in hmun a pek chu a hmunah a tlawh a, Tuirial YMA Hall-a Myanmar raltlan awm mekte a tlawh bakah, Tuirial MUP hnenah MUP In sakna atan MLA Fund atangin cheng nuai sawm a hlan bawk.