Kolasib district chhung, N. Chhimluanga methamphetamine (meth) man chungchangah thil thlen dan dik tak mipuiin an hriat theih nan chhui chianga hma laksak turin Dr Lalthlangliana, District Magistrate, Kolasib ngen.
February 11, 2022 khan N Chhimluang daiah Excise & Narcotics Department (END) leh BSF (Sector Hqrs BSF Intelligence Unit, Durtlang, 38th Bn. BSF Sakawrtuichhun leh Frontier Hqrs, Silchar, Assam) ten meth kg 12 leh gram 800 manin a neitua puh – Shamir Deb (49), Sonai road, Silchar, Assam leh Solomon Zonunmawia (35), Myanmar-a khawsa nia inchhalte chu thubuai an siamsak.
Hemi chungchangah hian sawi neuh neuh a awm avangin Kolasib chanchinbumi pahnih, Andrew VL Auva leh Zomuanpuia chuan zirchiangin man laia a bulhnaia awmte an kawmna atangin thil inthup a awm nia an hriat chhui chiang turin district magistrate-ah ngenna an thlen.
Ngenna an theh luhah meth manna kudam hmunah hian Assam lam BSF thleng chu meth kawltua puhten an hmuh velah car pakhat, hnam dang pathum chuanna chu kudam kawt atangin Vairengte lam pana tlan thutin bag pakhat an thlauh a. Ruihhlo phurtu ni ngeia hriat lirthei hi umzui ni loin Vairengte police emaw, excise duty emaw pawh lo danga lo man turin hriattir an ni lo chu thil mak tak a nih thu leh ruihhlo tam zawk an la phurh nia an sawi chu an tlan bopui ta vek tih an tar lang a ni.
Thuthar lakhawmtuten an zawh chianna hian Kolasib atanga BSF Mizoram-a duty-ten an sawm, Mizoram Excise, Kolasib an thlen thlak chuan kudam kawta meth bag khat lo awm chu an man ta ringawt a, hei hi END Kolasib te pawhin an pha lo niin an tar lang bawk.
&&&&&