Mexico-a silai keng mi sualte chuan tan ina kar hmasaa mi pakhat thihna avanga pun khawmna hmun an beihnaah mi pakua an kap hlum tih thuneitute chuan an sawi.
Heng mi pakuate hi hmar lama Ciudad Juárez khawpuia beihna vawi hnih an thlena an thahte an ni.
Mi sualte hian mitthi chenna ina a thian tha leh a chhungte awm khawm chu Pathianni khan an bei phawt a, hetah hian hmeichhe pahnih leh mipa an kap hlum.
A hnu darkar eng emaw zat hnuah mitthi an vuina inkhawm chu bei lehin mi dang paruk an that zui leh a ni.
Thil thleng hmutute chuan silai kengte hian evangelical church-a pastor-in vuina hunserh a hman laiin an luhchilh a. Vuinaa telte let zeta tam niin an sawi a. Silai an hmeh puah chuan a awmte chu an chiai nasa hle tih an sawi.
Thi zingah hian mipa naupang kum 12 mi leh a pa pawh an tel.
Heng beihna thleng pahnih chhuitute chuan a titute hi mi sual pawl thuhmun an nih a rinawm thu tual chhung chanchinbute hnenah an sawi.
Thuneitute chuan tan ina thi, an vui ber hi tunge a nih an sawi lo va; mahse, prosecutor pisa chuan Nilaini khan Chihuahua khawpui tan inah thah a ni tih a sawi thung.
A ruang hi a chhungte vui turin Ciudad Juárez-ah hian lak a ni.
Attorney general chuan Ciudad Juárez-a tualthahna tam zawk hi ruihhlo tawlhrutu pawl inhal takte inkara thleng niin a sawi.