- Zirsangkima
Laljenny tawp!
Jenny chu Mizo a ni ve tho a, a hming pum chu Laljenny-i a ni—tawp mai a! Aizawlah college kalin a awm a; hmeichhe awm khâwmna, ‘hostel’ an ti angah hian a awm. An khuaa a nu leh pate a ngai \hin hle—a unaute pawh. Mahse, anni aia ngaih a nei ta tlat mai.
Zan khat a muhìl thei loin WhatsApp-a thu hrang hrang a chhiar laiin mi pakhat hian a mi mal báwm (private)-ah a rawn be hlawl mai a nih kha—‘Mu thei lo mi?’ tiin.
Jenny, nula chhe lo, an khuaa nula tuaitìr zínga to ber; a mi mal báwma tlangvál rawn betu ngah ve tâwk tak; amah betu mipa nazawng chháng lêt zen zen lo chuan chu pa thlalâk (display picture) chu a en hmasa a. Hmel \ha a ti a ni satliah lo, sexy a ti khat tlat mai! Chhàn zu châk tlat a. A chháng ta a nih khâ!
Chuta \ang chuan an inbe chho ta a…
Mimal Báwm lamah
Amah rawn betupa chu Aizawl véng lailí-a awm, mi challang leh khawsa thei tak fapa, Roa a ni; Lalroa tawp.
Mi mal báwma an inbiak \an tirh chuan inbiak satliahin an inbe ve tho; mahse, a be hmasatuah a \ang ngai lo—Laljenny-i chu. Hei, ‘Vawiin eng nge i tih dawn?’ a rawn tih a, ‘Class ka kal ang,’ tih vêl ang chauhin an inbe \hin; ‘Chaw i ei tawh em?’ ‘Ei dawn chiah,’ tih ang vêl chauh te’n.
Mahse, hun rei lo te hnuah, an mi mal báwma an inbiakna chu, then fai loh phei chuan, an inbiak \an zàna an thu inthawnte kha, North Pole ang maia hlá a ni ta thuai mai—khítah a awm tawh. Chhoh vang vang a ngai! ‘Hello búr’ an ken chhúng chu an inbe ngar ngar \hin, ti ila kan sawi sual kher lo ang. An ken loh lai, hello búr an charge lai pawh an vil rùn ta zêl!
Mi zawng zawngin, ‘Êm êma na!’ emaw ‘Hello búr nei bik’ emaw an tih hial tùr khawpa nasain an inchhu ni tin zan tin \hin. Tûk tin hello búr hmangin an inkai tho a; zan tin, ‘Mang \ha, mut tui…’ ti hmasatu nih an hreh ve ve leh \hin si a…
‘Ni’ nasa tak an ni!
Chutianga nasaa ràl a\anga inngaihna thu leh ‘thu-kap-zen’ deuh deuh hmang tea an inràl-sài pap pap chinah chuan, an ei duhzáwng te, an rimawi ngainatzáwng te, an inbual hun leh an inthiar hunte mai bâkah an ngaihzáwng neih tawh zât chenin, a taka inhmuh huna inzawh hran ngai tawh kher loa chiangin an inhriat tawnsak vek tawh. Hmangaih thu thlum tinrêng an infah tawh. An duhthawh thei nasa. Status-ah an inhman tawnsak hial \hin. An va’n inngai êm! An va’n inhmangaih êm! An va’n ‘ni’ êm! ‘Ni’ nasa tak an ni!
Lalroa hian Laljenny a biak hma hian chhas a nei ve kar. Mahse, a chhas kiangah pawh Laljenny biak a \hulh thei si lo! A chhas pawh chuan a hello búr chu a thîk thuai a; Lalroa chuan a \hen hmak! A va’n ‘pasal\ha’ rem rem êm! Chuvâng pawh chu a nia, a thawnthu hi ziaha a awm ve tâk ni!
Dik tak chuan Laljenny pawh hi, hetiang rêng rêng hian mipa lakah a la tui ral ngai lo—tùn hmá zawng khán. Tin, tui ral tùr paw’n a inring ngai lo. WhatsApp lamah a reh ta raih—fatu chan a channa group hrang hrangah leh a mi mal báwma mi dang lakah pawh. Tin, an khaw lama a nu leh pa leh a unau a ngaihna te pawh a tla ta rawih rawih mai bawk a. An hostel-a a \hiante nèna chawhlui an kîl lai paw’n amahin a khi leh vùn vùn fo! Mi ã a ang ta mang e!
Charlotte |huam-\hiani
Hostel pindan a luahpui Charlotte |huami paw’n a ning thuai a. A pindan luahpui ber biak theih hek loh! An pahnihin pindan khat luah mah se Charlotte |huami chu a khua a harin a mal ngawih ngawih zêl; a \hiannu khua a’n har loh tehrêng nèn! ‘|huam-\hian’ tia a koh \hin Charlotte |huami chuan pindan danga insawn dàn a ngaihtuah chúk chúk pawh hi thil mak a ni lo.
Thla leh lawka an exam tùr pawh a hmáa a’n vei \hin nèn; tûnah chuan a thénga thãwngah a lût tawh lo. ‘Judicial Activism, Judicial Review … blah blah blah…’ tih vêl ai chuan, ‘I kiangah zál reng mah ila, ka ngai reng tho ang che!’ tih vêl chu a vawng chiang fé tawh zâwk ang chû—Laljenny chuan!
‘V’ Day-ah aw…’
Roa leh Laljenny chuan ihmuh an intiam thuai a. A hun atán kár leh Thawh\anni, Valentine’s day an rek ta rak mai. A hmunah pawh Restaurant cum Order hotel lo deuh an duh. Tlai lam, Laljenny class bàn pahin … an ti. Chutiangah chuan inhmuh an tum ta…
Valentine’s day chu a lo thleng a. Chumi tûka Laljenny insiam reizia chu! ‘Palh thutah!’ tiin kekawrtê ringawt pawh a thlâk zing e—a kawr leh kekawr chu sawi loh. Charlotte |huami Converse pheikhawk a hawh a inthawlhin meuh chuan a college kal hun a pèl tawh hle a ni—nasa takin.
Lalroa pawh a awm hle hle thei bîk lo. A inthlâk ve sek tho. A zial pawh a hek e! A hriat loh hlànin FarStar tlâwn khat chu a fâwp zo zung zung mai. Tlai a nih meuh chuan a Flyte scooter chu a pêt nung ta vut vut mai. (Hetah hian 2022-ah chuan Flyte scooter thar tak a awm tawh lo tih chhiartuten hriat tùr a ni). A duh ai chuan a bâl. ‘A pû a fai tho. Centre pawh a fresh!’ a ti mai a. Aizawl khaw daia Lunga’s Café lam pan chuan a inkhalh chhuak ta.
Roa chuan dawhkàn âwl chu a pan a, Jenny nghâkin a lo \hu a. A phone a phawrh. Minute 12 liamta khân Jenny chuan college a\anga a chhuah chiah thu a rawn hrilh a. ‘Thleng chiah e, my Valentine,’ tiin a chhâng a. Zei a va’n inti êm!
Laljenny nghah pahin tiin Sawhchiar leh artui chhum a lam a. An nei lo hlauh. A lãwm angreng. ‘Sum a hek lo ting,’ a ti rilru. Jenny kianga thu a sawi dàn tùr indawt (step), a hello búra a chhut chu a’n vawng \ha leh a. En lo ten a’n sawi \ha leh vêl \hin. A va’n \ang êm! Chêt chhiat a va’n hlau êm!
WhatsApp a ni tawh lo!
Chutia mit chhínga meng leh zuk zuk chunga a khawsak lai chuan Laljenny chuan Lunga’s Café chu a rawn rap lût ta chheng chheng mai. A va nalh êm! A va mawi ‘full’ fuh êm! Rose pár a rawn keng.
Chû Café-a mi dang lo awm ve zawng zawng, a hmeia pa mit chu amahah a fu \hup mai. ‘Tú Valentine tak ni ang maw?’ tih melhin an melh vek. Ani chuan nichina Sawhchiar leh artui chhum lamtupa lam a pan si!
An han inhmu chu WhatsApp a ni tawh si lo; Zawngte hmai hup lem te a tel thei tawh lo; an lài dùn ve ngang.
Lalroa chu inla zei takin, ding chungin Laljenny lo lawm pah chuan, ‘I va’n chhe lo khat ve … i khal muk khat tawp bawk si, ka Valentine,’ a ti!
Laljenny chuan rose sen lem, sarang fíma tuam chu pêk pahin, ‘Ka làwm e,’ a ti a. A nui. Amaha awm, thil mawi êm êm nui hmél chu a hmuh a.
‘Nestea nge Nes-Coffee?’ tiin Lalroa chuan a zâwt.
Laljenny chuan a ngainat loh thu a hrilh a. WhatsApp lama sawi tùr an ngah tehrêng nèn, a takah chuan thu zawng zawng chu an thlâwk bo ta vek emaw tih mai tùr a ni. An ngawi dùn reng a. An reh veng veng a; ‘reh ri’ takngial pawh hriat tùr a awm lo! An lung chu, Lunga’s Café-ah chuan a phu dup dup mai.
A hmuam chi nen V’ Day
Lalroa chuan Café bathlàr, Aizawl thlìr theihnaah chuan a kai chhuak a. A ngaih tawh thu a sawi ve ta. Laljenny chu a kuah. An ngawi leh veng veng. Roa chuan FarStar a phawrh a. A lighter-ah a’n sawh muk hmasa a. A \an ta a.
‘Thaw-hah ka nei ka tih kha…’ Laljenny chuan a ti.
Lalroa chuan a zial chu tih hlum a tum chuang lo. A tum lo pawh a ni lo, nacháng a hre lo. ‘ ’Nge? …’ tih pahin a hnár khu chhuah ang hlut hlut roh a.
‘I cigarette hi …’ khuh kharh kharh pahin hmél núr zetin Jenny chuan Lalroa chu a en a. Lalroa chuan a liak hlum a. A bung chu nakina zûkah tiin a FarStar báwmah chuan a khung leh.
Lalroa chuan, ‘A nih chuan…’ tih pahin a jean kekawr a zen a. Shikhar a rawn phawrh. Jenny chu a pe ve. Ani’n lo ngaithei lo nasa! Ner náwngin, ‘Hmm! Gutkha ka ei ngai lo e a!’ a lo ti bung hmuk mai si.
Lalroa chuan tlàwm a tum lo. Jenny chu a hmuam chi nèna V’ Day hmanpui a tumruh tlat! A jean ‘left-ipte’ a zen leh. Sahdah fùn lian tâwk, thla khat hmuam daih tùr hi a rawn phawrh leh a. ‘Nih leh kha,’ a’n ti leh. Jenny chuan lehlam a hawisan hmak.
A Pawi Ta…
‘Duh chuang lo maw?’ tih pahin Lalroa chuan Shikhar tam mangkhèng chu a’n hmuam pãwng lùng mai a. Chutah, Shikhar rim nam huam chungin, ‘Jenny, my Valentine … you Valentine me too, no?’ tih pahin a kuai lawp a. Jenny duh lo chung chu a fâwp lui ta nawk nawk mai!
Laljenny te meuh fâwp pha chin a ni; mahse, lungawi taka fâwptu erawh Lalroa chu a ni lo! Tin, Jenny chuan Lalroa chu a chháng lêt ve tihna pawh a ni lo!
‘Hei! Min thlah rawh. Ka hãw duh … min thlah rawh!’ Jenny chuan a ti ta.
Lalroa chuan muang ban charhin, ‘Petrol hi … bâkah ka scooty ke hnung saw…’ tiin a riat ta nuah nuah a.
Eng sawi set set loin Jenny chuan Lunga’s Café chu a chhuah tauhsan nghawng nghawng a.
SK leh SD vàngin maw?
Lalroa chuan Jenny chu telephone a tum a. Mahse, an ina wify a man bâk eng mah neih nei hek lo! A hãw thuai thuai a, in a\angin telephone a tum leh. Jenny chuan a chháng duh si lo.
Zànah chuan WhasApp mimal báwmah a tih tauhna chhan Laljenny chu a zâwt chiam a. Chhànna a hmu tawh lo! A hnu fé, a mu dáwn \êp tihah Jenny thu thawn chu a hmu ta:
‘Kei aiin Shikhar leh sahdah te, ka tih theih hlawl loh cigarette te i hmangaih zâwk tlat a, an tel loin i kim thei lo; kei chu ka liam zâwk tâng e. Khâng man te kha lo khâwl la, petrol lo nei ve tawh rawh aw… Thaw rim pangngai neih tum ve la, chutiang chuan i Valentine lehpek chu i fâwp dáwn nia. Ani paw’n lãwm takin a chháng duh ang che. Ka \hian, mang \ha kumkhua le…’
Lalroa chuan, a Shikhar hmuam ruahna káwr a ken chu en reng chungin, ‘SK—Shikhar vàngin maw min hnãwl,’ ti chungin a \ap ta hluam hluam a…